ABŞ-da Erin qasırğası ilə bağlı fövqəladə vəziyyət elan edilib

Milli Qasırğa Mərkəzi (NHC) tropik fırtınadan qasırğaya çevrilən “Erin”in bu gün axşam saatlarında Şimali Karolina sahillərinə çatacağını açıqlayıb. Saatda 110 km sürətlə irəliləyən və hazırda 2-ci kateqoriya gücündə olan qasırğanın xüsusən sahilyanı ərazilərdə təhlükə yaradacağı bildirilib. Qasırğa səbəbindən Outer Banks bölgəsində dalğaların 7 metrə çatacağı proqnozlaşdırılır və sakinlər üçün evakuasiya əmri verilib. Dövlət rəsmiləri ştat boyunca xilasetmə əməliyyatlarının aparıldığını və insanlara dənizdən uzaq durmaq barədə xəbərdarlıq edib.

21 Avqust 2025 11:13

BAKI, AzerVoice, Nərmin Ağayeva

ABŞ-ın Şimali Karolina ştatında “Erin” qasırğası ilə bağlı fövqəladə vəziyyət elan edilib.

AzerVoice xəbər verir ki, Milli Qasırğa Mərkəzi (NHC) tropik fırtınadan qasırğaya çevrilən “Erin”in bu gün axşam saatlarında Şimali Karolina sahillərinə çatacağını açıqlayıb. Saatda 110 km sürətlə irəliləyən və hazırda 2-ci kateqoriya gücündə olan qasırğanın xüsusən sahilyanı ərazilərdə təhlükə yaradacağı bildirilib.

Qasırğa səbəbindən Outer Banks bölgəsində dalğaların 7 metrə çatacağı proqnozlaşdırılır və sakinlər üçün təxliyə əmri verilib. Dövlət rəsmiləri ştat boyunca xilasetmə əməliyyatlarının aparıldığını və insanlara dənizdən uzaq durmaq barədə xəbərdarlıq edib.

Şimali Karolina qubernatoru Coş Steyn mətbuat konfransında bildirib ki, üç sürətli su xilasetmə qrupu, 200 Milli Qvardiya əsgəri, xilasedici təyyarələr və vertolyotlar sahilboyu yerləşdirilib.

Qeyd edək ki, 2025-ci ilin ilk qasırğası olan “Erin” son 24 saatda 1-ci kateqoriyadan 5-ci kateqoriyaya qədər güclənərək Atlantik okeanında qeydə alınan ən sürətli fırtınalardan birinə çevrilib. NHC xəbərdarlıq edib ki, qasırğa ABŞ və Kanadanın şərq sahilləri boyunca təhlükəli dalğalar və güclü cərəyanlar yaradacaq.