BAKI, AzerVoice, Nərmin Ağayeva
Kolumbiya prezidenti Qustavo Petro, ABŞ konqresmeni Karlos Gimenezin həbs təhdidinə sərt reaksiya verərək, “Sizin Latın Amerikasında xalq tərəfindən seçilmiş dövlət başçısını mühakimə etməyə haqqınız yoxdur,” - deyə bildirib.
AzerVoice xəbər verir ki, Petro, X platformasında Gimenezin “Qustavo Petro öz həbs cəzasına imza atdı” sözlərinə cavab olaraq, “Siz Pinoçeti mühakimə edə bilərdiniz, amma o sizin müttəfiqiniz idi. Venesuelaya daşınan kokain alanlara dair sübutlarım var. Əgər həqiqət həbsxana deməkdirsə, mən həbsxanaya gedəcəm,” - ifadəsini işlədib.
Gimenez, Petronun “Cartel de los Soles kimi təşkilat yoxdur” sözlərinə reaksiya verərək, bunun “son dərəcə ciddi ittiham” olduğunu və ABŞ Konqresinin buna zarafat kimi baxmayacağını bildirib. Petro isə bu iddianı “ifrat sağçıların hökumətləri devirmək üçün bəhanəsi” kimi qiymətləndirib. O, avqustun 26-da “Kartel de los Soles”in mövcud olmadığını, bunun ABŞ-ın Venesuela prezidenti Nikolas Maduronu hədəf almaq üçün uydurulduğunu iddia edib.
Qeyd edək ki, ABŞ, Maduronu “Kartel de los Soles”in lideri kimi ittiham edir və onun həbsi üçün mükafatı 25 milyon dollardan 50 milyon dollara yüksəldib. İyulun 25-də ABŞ Maliyyə Nazirliyi bu təşkilatı “Xüsusi Təyin olunmuş Qlobal Terrorçular” siyahısına daxil edib.
Petronun ABŞ-ın Venesuela siyasətinə qarşı mövqeyi və deportasiya qadağası Kolumbiya-ABŞ münasibətlərini gərginləşdirib. X platformasında yayılan fikirlər, Petronun açıqlamalarının Latın Amerikasında ABŞ-ın təsirini zəiflətmək cəhdi kimi qiymətləndirildiyini göstərir.
