BAKI, AzerVoice, Nərmin Ağayeva
Son 24 saatda Qəzza zolağında aclıq və qida çatışmazlığı səbəbindən üçü uşaq olmaqla , 9 nəfər həyatını itirib.
AzerVoice xəbər verir ki, Qəzzadakı Fələstin Səhiyyə Nazirliyi aclıqdan ölənlərlə bağlı son məlumatları özündə əks etdirən yazılı açıqlama yayıb. Açıqlamada bildirilib ki, son bir gündə üçü uşaq olmaqla 9 fələstinli aclıq və qida çatışmazlığı səbəbindən dünyasını dəyişib. 2023-cü ilin oktyabr ayının 7-dən bəri Qəzzada aclıqdan ölənlərin sayı 348-ə çatıb, onların 127-si uşaqlardır.
Birləşmiş Millətlər Təşkilatının (BMT) dəstəklədiyi İnteqrasiya edilmiş Qida Təhlükəsizliyi Faza Təsnifatı (IPC) 22 avqust tarixində Qəzzada aclıq elan etdikdən sonra 12-si uşaq olmaqla 70 nəfər aclıq və qida çatışmazlığından həyatını itirib. IPC-nin son hesabatında qeyd olunur ki, 15 avqust 2025-ci il tarixinə Qəzza şəhərində aclıq “fəlakətli səviyyə” kimi təsnif edilən 5-ci səviyyədədir. Hesabatda vurğulanır ki, 22 aylıq amansız münaqişə nəticəsində Qəzza zolağında yarım milyondan çox insan aclıq, yoxsulluq və ölümə səbəb olan dəhşətli şəraitlə üzləşib.
İsrailin hərbi hücumları və humanitar yardımları məhdudlaşdıran sərt blokadası Qəzza zolağını geniş miqyaslı aclıq, su, dərman və gigiyena ləvazimatlarının çatışmazlığı ilə üzləşən humanitar fəlakətə sürükləyib. Xüsusilə uşaqlar arasında aclıqdan ölüm halları kəskin şəkildə artmaqdadır. Yerli və beynəlxalq təşkilatlar İsrailin “aclıq və susuzluğu silah kimi” istifadə etdiyini bildirir.
Qəzzanın 2,3 milyonluq əhalisindən təxminən 2 milyonu İsrailin hücumları və deportasiya əmrləri səbəbindən didərgin düşüb, bir çoxu dəfələrlə yurd-yuvasından köçməyə məcbur olub. Əsas ləvazimatlardan məhrum olan fələstinlilər müvəqqəti çadırlarda və ya yoluxucu xəstəliklərin yayıldığı, gigiyena ləvazimatlarının çatışmadığı və sanitar şəraitin son dərəcə aşağı olduğu həddindən artıq dolu məktəblərdə sağ qalmağa çalışır. İsrail ordusu isə köçkünlərin sığındığı çadırları və mülki obyektləri hər gün bombalayaraq hücumlarını davam etdirir.
Qeyd edək ki, Qəzza zolağında yaşanan bu humanitar fəlakət İsrailin 2023-cü ilin oktyabr ayından bəri davam edən hərbi hücumları və sıx blokadası nəticəsində yaranıb, bu da mülki əhalinin əsas ehtiyaclara çıxışını kəskin şəkildə məhdudlaşdırıb.
