BAKI,AzerVoice, Fərid Mikayılov
ABŞ prezidenti Donald Tramp Karib dənizinin cənubunda Venesueladan çıxış edən sürət qayığına qarşı həyata keçirilən hərbi əməliyyat nəticəsində “Tren de Aragua” qrupuna məxsus 11 nəfərin öldürüldüyünü açıqlayıb.
AzerVoice xəbər verir ki, bu barədə Tramp sosial şəbəkəsi Truth Social üzərindən paylaşım edib.
Yayımladığı mesajında hücumun beynəlxalq sularda baş verdiyini və əməliyyatda ABŞ hərbçilərinin itki vermədiyini bildirib.
“Bu, ABŞ-a narkotik daşımağı düşünənlər üçün açıq bir xəbərdarlıqdır”- deyə o, paylaşımına “məxfilikdən çıxarılmış” qeydli video da əlavə edib.
Tramp administrasiyası Latın Amerikasından ABŞ-a narkotik axınının qarşısını almaq üçün son həftələrdə bölgədə donanma iştirakını artırıb. Vaşinqton, xüsusilə fentanil kimi maddələrin cəmiyyət üçün təhlükə yaratdığını vurğulayır. ABŞ rəhbərliyi “Tren de Aragua”nı xarici terror təşkilatı kimi tanıyır və Maduronun bu qrupla əlaqəli olduğunu iddia edir.
Venesuela prezidenti Nikolas Maduro əməliyyata birbaşa toxunmasa da, tərəfdarları ilə Karakas küçələrində yürüş edərək ABŞ-ı ölkənin enerji sərvətlərini ələ keçirmək cəhdində ittiham edib.
Venesuela hökuməti isə Trampın yaydığı görüntülərin gerçəkliyini şübhə altına alıb. İctimaiyyətlə Əlaqələr naziri Freddy Nanes videonun “yüksək ehtimalla süni intellektlə hazırlanmış animasiya təsiri bağışladığını” bildirib.
