Pakistanda daşqınlar səbəbindən 300 minə yaxın insan təxliyə edilib

Pakistanın Pəncab əyalətində güclü musson yağışlarının səbəb olduğu daşqınlar və bölgədəki çaylar və su anbarlarında su səviyyəsinin yüksəlməsi nəticəsində son 48 saat ərzində təxminən 300 min nəfər təhlükəsiz bölgələrə köçürülüb. Musson yağışlarının yaratdığı daşqınlar nəticəsində Hindistan sərhədinə yaxın Naroval və Sialkotdan sonra Muzaffargarh bölgəsində də onlarla kənd su altında qalıb. Əyalətin Fəlakətlərin İdarə Olunması Agentliyinin (PDMA) baş direktoru Arfan Əli Katxia bildirib ki, qayıqlarla aparılan axtarış-xilasetmə əməliyyatlarında minlərlə işçi iştirak edir, ordu bölmələri isə su altında qalan kəndlərdən insanların və heyvanların təxliyəsi üçün səfərbər olunub. Son 48 saat ərzində təxminən 300 min nəfər təhlükəsiz bölgələrə təxliyə edilib. Katxia qeyd edib ki, əyalətdəki 33 min kənddə 3,3 milyondan çox insan daşqından zərər çəkib, dağıntıların qiymətləndirilməsi davam edir və evlərini itirənlərə hökumət tərəfindən kompensasiya veriləcək.

3 Sentyabr 2025 17:21

Bakı, Azərbaycan

BAKI, AzerVoice, Nailə Babazadə

AzerVoice xəbər verir ki, Musson yağışlarının yaratdığı daşqınlar nəticəsində Hindistan sərhədinə yaxın Naroval və Sialkotdan sonra Muzaffargarh bölgəsində də onlarla kənd su altında qalıb.

Əyalətin Fəlakətlərin İdarə Olunması Agentliyinin (PDMA) baş direktoru Arfan Əli Katxia bildirib ki, qayıqlarla aparılan axtarış-xilasetmə əməliyyatlarında minlərlə işçi iştirak edir, ordu bölmələri isə su altında qalan kəndlərdən insanların və heyvanların təxliyəsi üçün səfərbər olunub.

Son 48 saat ərzində təxminən 300 min nəfər təhlükəsiz bölgələrə təxliyə edilib. Katxia qeyd edib ki, əyalətdəki 33 min kənddə 3,3 milyondan çox insan daşqından zərər çəkib, dağıntıların qiymətləndirilməsi davam edir və evlərini itirənlərə hökumət tərəfindən kompensasiya veriləcək.

Katxia əlavə edib ki, bölgədəki bəndlərdə və Ravi, Çenab və Sutlec çaylarında su səviyyəsinin qalxması daşqınlara səbəb olub.
Xilasedici qruplar damlarda qalan insanları müəyyən etmək üçün pilotsuz uçuş aparatlarından (PUA) istifadə edir, daşqından zərər çəkənlər üçün çadır şəhərcikləri salınıb, ərzaq və əsas ehtiyac malları paylanır.

Qeyd edək ki, Pakistan ötən ay daşqınlardan zərər çəkmiş bölgələrdə kütləvi təxliyələrə başlamışdı. Rəsmilər son təxliyələrlə birlikdə yerindən edilənlərin sayının 1,3 milyona çatdığını açıqlayıblar.

Cənubi Asiyada iyun-sentyabr aylarında təsirli olan musson yağışları, Hindistan və Pakistan başda olmaqla region ölkələrində hər il genişmiqyaslı təbii fəlakətlərə və qəzalara yol açır.

Pakistan üzrə 26 iyundan bəri baş verən daşqınlarda 800-dən çox insan, Hindistanın Himaçal Pradeş əyalətində isə iyunun əvvəlindən bu yana təxminən 300 nəfər həyatını itirib.

Pəncabın Baş Naziri Məryəm Aurangzeb bu fəlakəti "Pəncab tarixinin ən böyük daşqın faciəsi" olaraq qiymətləndirib və su səviyyəsinin ilk dəfə bu qədər yüksəldiyini bildirib.