BAKI, AzerVoice, Səməd Əyyubov
Misir fələstinliləri öz ərazisində qəbul etmək niyyətində olmadığını bəyan edib.
AzerVoice xəbər verir ki, bu barədə Misirin xarici işlər naziri Bədr Əbdülati açıqlama verib.
“Fələstinlilərin köçürülməsi variant deyil. Bu, Misir üçün qırmızı xətdir və biz buna imkan verməyəcəyik” – deyə, nazir bildirib.
Onun sözlərinə görə, “köçürülmə Fələstin məsələsinin ləğvi və sonu deməkdir. İnsanların öz vətənlərindən çıxarılmasına heç bir hüquqi, mənəvi və ya etik əsas yoxdur.”
Qeyd edək ki, Misir daha əvvəl İsrailin Qəzza zolağındakı hərbi əməliyyatlarını pisləyib. Bununla yanaşı, Qətər və ABŞ-la birlikdə bölgədə atəşkəsin təmin olunması üçün vasitəçilik missiyasını davam etdirir.
Hazırda İsrail Qəzza şəhərinə nəzarəti ələ keçirmək üçün əməliyyata hazırlaşır və ölkədə ehtiyat qüvvələrin səfərbərliyi elan olunub. Baş nazir Benyamin Netanyahunun ofisi avqustun 8-də bu planların təsdiqləndiyini açıqlayıb. Sözügedən qərar həm İsrail daxilində, həm də beynəlxalq ictimaiyyətdə ciddi tənqidlərə səbəb olub.
