BAKI,AzerVoice, Fərid Mikayılov
Tunisin təhlükəsizlik qüvvələri Sidi Busaid limanında Azadlıq Flotiliyasının əsas gəmisinə qarşı həyata keçirilən dron hücumu ilə bağlı araşdırma aparır.
AzerVoice xəbər verir ki, Flotiliya rəhbərliyi hücuma baxmayaraq Qəzzaya doğru yola davam edəcəklərini bəyan edib.
Paytaxt Tunisdə keçirilən mətbuat konfransında Mağrib Flotiliyası İcra Komitəsinin üzvü Qəssan əl-Hənşiri bildirib ki, istintaq Tunisin təhlükəsizlik qurumları tərəfindən davam etdirilir.
“Dünən gecə baş verənlərin detalları Tunis rəsmilərinin əlindədir. Xüsusi qrup araşdırma aparır, bütün texniki yoxlamalar həyata keçirilir. Bu məsələ dövlət təhlükəsizliyi ilə bağlı olduğundan əlavə detallar açıqlaya bilmərik. Ancaq heç kim bizi Qəzzaya getməkdən çəkindirə bilməz” – deyə Hənşiri vurğulayıb.
Onun sözlərinə görə, flotiliyanın yeganə məqsədi İsrailin Qəzzaya tətbiq etdiyi blokadanı yarmaq və bölgədə davam edən soyqırıma qarşı beynəlxalq həmrəyliyi gücləndirməkdir.
Flotiliya rəhbərliyi ötən gecə sosial şəbəkədə yaydığı məlumatda, ən böyük gəmilərindən birinə “PUA hücumu” edildiyini bildirmişdi. İdarə heyətinin üzvü Nebil Şənufi videomüraciətində gəmidə xəsarət alan olmadığını, yalnız ön hissədə xırda zədələr meydana gəldiyini açıqlayıb.
Bununla yanaşı, Tunis Daxili İşlər Nazirliyi yayılan bəzi məlumatları təkzib edərək, gəmilərdən birinə insansız hava aparatının düşməsi barədə iddiaların həqiqətə uyğun olmadığını bildirib.
Azadlıq Flotiliyasının 10 sentyabr Çərşənbə günü Tunisiyadan yola çıxması planlaşdırılır. Flotiliyada onlarla türk və təxminən 150 Tunisli fəal iştirak edəcək.
