BAKI, AzerVoice, Səməd Əyyubov
ABŞ Ali Məhkəməsi prezident Donald Tramp tərəfindən digər ölkələrə qarşı tətbiq edilən bir sıra gömrük rüsumlarının qanuniliyini sürətləndirilmiş prosedurla araşdırmağa razılıq verib.
AzerVoice xəbər verir ki, məhkəmənin yaydığı bildirişə əsasən, tərəflərin dinləmələri bu ilin noyabr ayında başlayacaq.
Sənəddə qeyd olunub ki, dinləmələr 2025-ci ilin noyabr ayının ilk həftəsinə təyin edilib. Tərəflər öz arqumentlərini yazılı şəkildə sentyabrın 19-dək məhkəməyə təqdim etməlidirlər. Rüsumlar məhkəmə araşdırması başa çatana qədər qüvvədə qalacaq.
Sürətləndirilmiş prosedur işin ilin sonunadək nəticələnməsi ehtimalını artırır. Əks halda, adi qaydada baxılsaydı, qərarın ən tez 2026-cı ilin yayında çıxarılması mümkün olardı.
Xatırladaq ki, sentyabrın 4-də Tramp administrasiyası Ali Məhkəmədən avqustun 29-da Kolumbiya federal dairəsinin apellyasiya məhkəməsi tərəfindən çıxarılan qərarı ləğv etməyi xahiş etmişdi. Həmin qərara görə, Vaşinqtonun tətbiq etdiyi bir çox rüsumlar qanunsuz hesab edilib, çünki Trampın onları tətbiq etmək üçün hüquqi səlahiyyəti olmadığı vurğulanıb. Administrasiya isə bu qərarın digər ölkələrlə aparılan ticarət danışıqlarında “qeyri-müəyyənlik” yaratdığını və əldə olunmuş sazişləri “təhlükə altına qoyduğunu” bildirir.
Qeyd edək ki, apellyasiya məhkəməsinin qərarı ABŞ-ın aprel ayında bir sıra ölkələrə, həmçinin fevralda Çin, Kanada və Meksika məhsullarına tətbiq etdiyi rüsumlarla bağlı idi. İş isə biznes nümayəndələrinin ABŞ hökumətinə qarşı qaldırdığı iddia əsasında başlanmışdı. Sahibkarlar rüsumların qanunsuz olduğunu və şirkətlərinə ciddi zərər vurduğunu bəyan ediblər.
