BAKI,AzerVoice, Fərid Mikayılov
ABŞ Prezidenti Donald Tramp, İsrailin Qətərin paytaxtı Dohada HƏMAS liderliyini hədəf alması ilə bağlı açıqlama verərək, hadisədən “heç məmnun olmadığını”, lakin hücumu rəsmi şəkildə qınamaqdan imtina etdiyini bildirib.
AzerVoice xəbər verir ki, İsrail ordusu 9 sentyabrda Dohada, ABŞ-ın təklif etdiyi Qəzza atəşkəsi planını müzakirə edən HƏMAS rəhbərliyinə hava zərbələri endirib.
HƏMAS açıqlamasında bəzi yüksək vəzifəli rəhbərlərin sağ qaldığını, lakin aralarında təşkilatın Qəzza rəhbəri və baş müzakirəçi Xalil əl-Həyyənin oğlu, üç mühafizəçisi və ofis müdiri də olmaqla beş nəfərin öldüyünü açıqlayıb.
ABŞ Prezidenti Tramp hücumu “təktərəfli addım” adlandıraraq, bunun “nə İsrailin, nə də ABŞ-ın maraqlarına xidmət etmədiyini” vurğulayıb.
Qətərin ABŞ üçün strateji əhəmiyyətini xatırladan müşahidəçilər, ölkənin həm arabuluculuq rolu, həm də ABŞ-ın bölgədəki ən böyük hərbi bazalarından biri olan Əl-Udeid Hava Bazası ilə diqqət mərkəzində olduğunu vurğulayırlar.
Hücum Qətərin beynəlxalq hüquqa və ərazi bütövlüyünə zidd hərəkət kimi qiymətləndirilib.
İsrail Baş naziri Beniyamin Netanyahu isə hücumu “tamamilə haqlı” adlandıraraq, məqsədin 7 oktyabr hücumlarının məsuliyyətini daşıyan HƏMAS liderlərini zərərsizləşdirmək olduğunu vurğulayıb.
