BAKI,AzerVoice, Fərid Mikayılov
HƏMAS sözçüsü Hazem Qasim bildirib ki, İsrail atəşkəs razılaşmasının bəzi mühüm maddələrini, xüsusilə əsir mübadiləsi və Qəzzadan çıxma ilə bağlı maddələri manipulyasiya etməyə çalışır.
AzerVoice xəbər verir ki, Qasim açıqlamasında deyib ki, İsrail bu maddələri sui-istifadə etməyə cəhd edir və bu məsələlərin müzakirəsindən yayınır.
Onun sözlərinə görə, əsas məsələ əsirlərin mübadiləsi üçün şəraitin yaradılmasıdır.
HƏMAS sözçüsü həmçinin vurğulayıb ki, atəşkəs razılaşması Fələstin xalqına qarşı qəddar müharibənin sonu deməkdir.
Rəsmi açıqlamada HƏMAS qeyd edib ki, atəşkəs razılaşması Misirdə, Şarm əl-Şeyxdə aparılan danışıqlar nəticəsində əldə olunub.
HƏMAS ilə İsrail arasında dolayı danışıqlar bazar ertəsindən başlayıb və prosesdə Misir, Qətər və Türkiyə vasitəçilik edib. Danışıqlar ABŞ Prezidenti Donald Trampın 20 maddəli atəşkəs təklifini nəzərdən keçirmək məqsədi daşıyıb.
Atəşkəs elan edildikdən sonra ərəb və İsrail mətbuatı yerli vaxtla günortadan sonra atəşkəsin birinci mərhələsinin başladığını bildiriblər. Lakin İsrail Baş Naziri Benyamin Netanyahu ofisi bunun yalnız İsrail kabinetinin təsdiqindən sonra tətbiq olunacağını açıqlayıb.
