BAKI,AzerVoice

ABŞ prezidenti Donald Trampa qarşı yönəlmiş kütləvi etiraz aksiyaları şənbə günü ölkə üzrə on minlərlə insanı küçələrə çıxarıb. Aksiyalar prezidentin “avtoritar meyilli siyasətləri”nə etiraz məqsədi daşıyıb.Təşkilatçıların məlumatına görə, təxminən 7 milyon insan 2700-dən çox şəhər və qəsəbədə dinc yürüşlərdə iştirak edib - bu, iyun ayında keçirilən əvvəlki etiraz dalğasından yüzlərlə məntəqə artıqdır.

Etirazçılar “Heç kim qanundan üstün deyil”, “Demokratiya - diktatura deyil” kimi şüarlar səsləndiriblər. Bir çox iştirakçılar jurnalistlərə bildirib ki, Trampın ikinci prezidentlik müddətinin doqquzuncu ayına keçməsinə baxmayaraq, ABŞ-da demokratiyanın təhlükə altında olduğuna inanırlar.

Nyu-York polisi şəhər üzrə keçirilən müxtəlif aksiyalarda 100 mindən çox iştirakçının qeydə alındığını açıqlayıb. Rəsmilər iğtişaş və ya həbslərin qeydə alınmadığını bildiriblər.

Almaniya xəbər agentliyinin məlumatına görə, Tayms meydanından Yunion meydanına qədər olan küçələr izdihamla dolub. Eyni zamanda, Vaşinqton, Boston, Atlanta, Çikaqo, Los-Anceles və digər iri şəhərlərdə də minlərlə insan küçələrə çıxıb.

Pensilvaniyanın Pittsburq şəhərində minlərlə vətəndaşın iştirak etdiyi yürüşlər keçirilib, daha kiçik şəhərlərdə – məsələn, Vaşinqton bölgəsindəki Bethesda və Florida ştatının Sarasota qraflığında da izdihamlı aksiyalar baş tutub.

CNN xəbər verib ki, Cənubi Karolinada bir qadın etirazçılara silah tuşladığı üçün saxlanılıb.

Etirazları təşkil edən hərəkatın saytında qeyd olunub ki, “Tramp administrasiyası küçələrə maskalı agentlər göndərir, icazəsiz həbslər həyata keçirir və ictimaiyyətdə qorxu mühiti yaradır.”

Hərəkat Trampı seçkiləri təhlükə altına salmaqda, sağlamlıq və ətraf mühitin müdafiəsi mexanizmlərini zəiflətməkdə, varlı dairələrin mənafeyini qorumaqda ittiham edir.

“Prezident düşünür ki, hakimiyyəti mütləqdir, amma ABŞ-da diktatorlar yoxdur,” - deyə hərəkatın bəyanatında vurğulanıb.

Tramp və onun Respublikaçılar Partiyası bu ittihamları rədd edir. Harvard Universitetinin Kütləvi Tədbirləri Araşdırma İttifaqının məlumatına görə, Trampın ikinci prezidentlik dövründə etirazların sayı birinci dövrdən əhəmiyyətli dərəcədə çoxdur.

İyun ayında keçirilən aksiyalar ABŞ tarixində ən böyük ictimai etirazlardan biri kimi qeydə alınmışdı.