BAKI, AzerVoice
Tayland Kral Sarayının məlumatına görə, ölkənin “ana kraliçası” Sirikit 93 yaşında vəfat edib. AzerVocie xəbər verir ki, İkinci Dünya müharibəsindən sonrakı dövrdə Tayland monarxiyasına zəriflik və parlaqlıq gətirən Sirikit, uzun illər ərzində xalqın dərin hörmətini qazanmışdı.
Tayland hökumətinin sözçüsü bildirib ki, baş nazir Anutin Çarnvirakul “ana kraliça” Sirikitin vəfatı ilə əlaqədar Malayziyada keçiriləcək Cənub-Şərqi Asiya Millətləri Assosiasiyası (ASEAN) sammitinə səfərini ləğv edib. Bu gün Nazirlər Kabineti dəfn mərasiminin təşkili ilə bağlı toplanacaq.
Sirikit 2012-ci ildə insult keçirdikdən sonra ictimaiyyət qarşısında görünmürdü. Onun həyat yoldaşı, kral Bhumibol Adulyadej, 1946-cı ildən 2016-cı ilə qədər 70 il taxtda qalaraq Taylandın ən uzun müddət hakimiyyətdə olan monarxı olub. Cütlük xeyriyyə fəaliyyəti ilə xalqın sevgisini qazanmışdı.
Sirikit 1932-ci ildə diplomatik ailədə, Fransada səfir olan atasının ailəsində doğulub. Parisdə musiqi və dil təhsili aldığı dövrdə İsveçrədə böyüyən gələcək kral Bhumibolla tanış olmuşdu. Onlar 1949-cu ildə nişanlanıb, bir il sonra Taylandda evləniblər.
Zərifliyi ilə seçilən Sirikit, fransız dizayner Pyer Balmenlə əməkdaşlıq edərək Tayland ipəyindən hazırlanmış gözoxşayan geyimləri ilə beynəlxalq moda çevrələrində tanınıb. O, eyni zamanda ənənəvi toxuculuq sənətini dəstəkləyərək Tayland ipək sənayesinin dirçəlməsinə mühüm töhfə verib.
Dörd onillik ərzində kral Bhumibolla birlikdə ucqar kəndlərə səfərlər edən “ana kraliça” kəndlilərin rifahını artırmağa yönəlmiş sosial layihələrə rəhbərlik edib. Onun bu fəaliyyətləri hər axşam krallığın televiziya proqramlarında yayımlanırdı.
1976-cı ildən onun doğum günü (12 avqust) Taylandda Ana Günü dövlət bayramı elan edilib.
Kraliça Sirikitin yeganə oğlu, hazırkı kral Maha Vajiralongkorn (Rama X) atasının 2016-cı ildəki ölümündən sonra taxta çıxıb. 2019-cu ildə tacqoyma mərasimində Sirikitə “ana kraliça” titulu rəsmi şəkildə verilib.
Tayland monarxiyası formal olaraq siyasətdən kənarda dursa da, bəzən Sirikit də daxil olmaqla kral ailəsinin bəzi üzvləri siyasi xarakterli addımlar atmaqla diqqət çəkiblər.
Sirikit çoxsaylı tailandlıların yaddaşında xeyriyyəçiliyin və analıq fəzilətinin simvolu kimi qalacaq. Onun dörd övladı var - oğlu kral Maha və üç qızı.
