BAKI,AzerVoice, Orxan Qədirzadə
Vaşinqtonda Səudiyyə-ABŞ İnvestisiya Forumunun ikinci mərhələsi işə başlayıb. Tədbirdə iki ölkənin dövlət rəsmiləri, irimiqyaslı şirkətlərin rəhbərləri, investorlar, sahibkarlar və innovasiya sektorunun nümayəndələri iştirak edir.
AzerVoice xəbər verir ki, forum Səudiyyə Ərəbistanının Vəliəhd Şahzadəsi və Baş naziri Məhəmməd bin Salmanın ABŞ-a səfəri çərçivəsində keçirilir.
Bu il tədbir “İnkişaf üçün liderlik: Səudiyyə-ABŞ iqtisadi tərəfdaşlığının gücləndirilməsi” mövzusu altında təşkil olunub və iki ölkə arasında investisiya əməkdaşlığının genişləndirilməsinə yönəlib. Forum Səudiyyə İnvestisiya Nazirliyi tərəfindən təşkil olunub və tərəflər arasında texnologiya transferi, sənaye quruculuğu, istehsalın lokallaşdırılması və yeni iş yerlərinin yaradılması kimi hədəfləri əhatə edir.
Kennedi Mərkəzində keçirilən tədbirdə Chevron, Qualcomm, Cisco, General Dynamics, Pfizer kimi şirkətlərin rəhbərləri ilə yanaşı IBM, Google, Salesforce, Boeing, Adobe, Halliburton, Aramco, Parsons və State Street kimi qurumların yüksək vəzifəli nümayəndələri iştirak edir.
Forum çərçivəsində süni intellekt, enerji, maliyyə, səhiyyə, müdafiə və kosmos, inkişaf etmiş sənaye istehsalı və infrastruktur kimi strateji sahələr üzrə panel müzakirələri keçirilir.
Süni intellekt mövzusunda keçirilən sessiyada Tesla-nın baş direktoru İlon Mask və Nvidia-nın CEO-su Censen Huand çıxış ediblər.
Məlumata görə, forum iki ölkə arasında artan siyasi, iqtisadi və təhlükəsizlik əməkdaşlığı fonunda keçirilir. Səudiyyə Ərəbistanı və ABŞ həm regional, həm də qlobal məsələlərdə koordinasiyanı davam etdirərək təhlükəsizlik, sabitlik və inkişafı hədəfləyən fəaliyyətləri birgə həyata keçirir.
