Bakı, AzerVoice, Orxan Qədirzadə
Ukrayna Prezidenti Vladimir Zelenski İrlandiya parlamentində çıxışı zamanı ölkəsinin “heç vaxt olmadığı qədər sülhə yaxın olduğunu” bildirib və beynəlxalq ictimaiyyəti müharibəyə son qoymaq üçün yaranmış diplomatik imkandan maksimum istifadə etməyə çağırıb.
AzerVoice xəbər verir ki, Zelenskinin sözlərinə görə, ABŞ-da keçirilmiş son danışıqlardan sonra Dublinə təqdim olunan geniş brifinq göstərir ki, müzakirələr yeni mərhələyə qədəm qoyub. “Real imkan yaranıb və bundan bütün dünya istifadə etməlidir – yalnız bir güclü dövlət yox,” – deyə o bildirib.
Prezident vurğulayıb ki, bir dövlət müharibəyə başlayanda “ədalətin bərpası və haqqın qorunması üçün millətlər birliyinin” iştirakı vacibdir. Onun sözlərinə görə, qlobal həmrəylik Ukraynanın ən güclü təsir alətinə çevrilib.
Zelenski çıxışında İrlandiyanın dəyişməyən dəstəyinə görə təşəkkür edib və bu ölkənin “azadlığın qiymətini yaxşı başa düşdüyünü”, həmçinin Rusiya üzərində beynəlxalq təzyiqin qorunmasında xüsusi rol oynadığını qeyd edib.
O, daha əvvəl İrlandiyanın yeni prezident Ketrin Connolly ilə görüşündə dəstəkləri üçün təşəkkürünü ifadə edib. Bu görüşdə Rusiya tərəfindən aparılmış ukraynalı uşaqların geri qaytarılması, iki irland universitetinin Ukrayna Araşdırmaları üzrə qlobal koalisiyaya qoşulması, eləcə də Ukraynanın Avropa İttifaqına üzvlük prosesinin sürətləndirilməsi məsələləri müzakirə olunub.
İrlandiya hökuməti Ukraynanın dəstəklənməsinə əlavə 125 milyon avro ayıracağını açıqlayıb. “Ukrayna–İrlandiya 2030 Yol Xəritəsi” sənədinə əsasən, bunun 100 milyon avrosu qeyri-letal hərbi yardıma, 25 milyon avrosu isə Ukraynanın enerji infrastrukturunun bərpasına yönəldiləcək.
İrlandiyanın Baş naziri Mişel Martinlə keçirdiyi mətbuat konfransında Zelenski bildirib ki, Kiyev ABŞ-ın Moskva danışıqlarından sonra verəcəyi “müvafiq siqnalları” gözləyəcək. O əlavə edib ki, Ukrayna münaqişəsinin həllində asan qərarlar olmayacaq, lakin Cenevrədə hazırlanmış və Floridada son forma verilmiş 20 maddəlik sülh çərçivəsi üzərində iş davam edir.
