BAKI, AzerVoice, Orxan Qədirzadə
Liviya paytaxtı Tripolidə yerləşən məşhur Mitiga həbsxanasında qətl, təcavüz və işgəncələrə rəhbərlik etməkdə ittiham olunan həbsxana rəisi Xalid Məhəmməd Əli əl-Hişri Beynəlxalq Cinayət Məhkəməsində (ICC) hakim qarşısına çıxıb.
AzerVoice xəbər verir ki, 47 yaşlı əl-Hişri 2015-ci ilin fevralından 2020-ci ilin əvvəlinə qədər Mitiga həbsxanasında törədilmiş altı müharibə cinayəti və altı insanlıq əleyhinə cinayətdə, o cümlədən qətl, işgəncə, təcavüz və təqibdə ittiham olunur.
ICC-nin açıqlamasına görə, həbsxananı “dəmir əl”lə idarə edən əl-Hişrinin bir məhbusu şəxsən öldürdüyünə dair “əsaslı şübhə” var. Onun rəhbərlik dövründə “əhəmiyyətli sayda” məhbus işgəncə, soyuq hava şəraitində çöldə saxlanma, yaraların müalicə olunmaması və aclıq nəticəsində həlak olub.
Məhkəmə bildirir ki, azı beş məhbus - o cümlədən 15 yaşlı yeniyetmə - nəzarətçilər və digər məhbuslar tərəfindən təcavüzə məruz qalıb. Qadın məhbuslara qarşı genişmiqyaslı seksual zorakılıq halları aşkarlanıb.
İddialara görə, əl-Hişri məhbuslara qarşı təcavüz, işgəncə və qətllərdə şəxsən iştirak edib, eləcə də bütün həbsxana heyətinə tam nəzarət edərək ağır şərait yaradıb. Minlərlə məhbusun saxlandığı Mitiga həbsxanasında məhbuslar davamlı olaraq döyülüb, kiçik metal qutulara salınıb, elektrik kabelləri və plastik borularla işgəncəyə məruz qalıb.
İlkin prosesdə əl-Hişri müdafiə tərəfinin təqdim etdiyi müraciətə uyğun olaraq şərti azadlığa buraxılma tələb edib. ICC mayın 19-da ittihamların təsdiqi üzrə növbəti dinləməni keçirəcək.
Bu iş, ICC-nin 2011-ci ildən bəri apardığı Liviya üzrə istintaq çərçivəsində məhkəmə qarşısına çıxan ilk şübhəlidir. Ölkə hələ də Qəddafinin devrilməsindən sonra yaranmış siyasi parçalanma və silahlı qarşıdurmalarla mübarizə aparır.
Human Rights Watch təşkilatının beynəlxalq ədalət direktoru Liz Evenson bildirib ki, məhkəmə prosesi “Liviya həbsxanalarında qapalı qapılar arxasında baş verən dəhşətli cinayətləri üzə çıxaracaq”.
ICC, həmçinin Mitiga həbsxanasında cinayətlərdə iştirakda ittiham olunan Liviya məhkəmə polisi rəhbəri Osama Əlmasri Nacimi də axtarışdadır. O, İtaliyada saxlanılsa da, daha sonra azad edilib və Liviyaya qayıdıb ki, bu da Romada siyasi qalmaqala səbəb olub.
