BAKI, AzerVoice, Orxan Qədirzadə
ABŞ Prezidenti Donald Tramp Kanadanın Çinlə ticarət sazişi bağlayacağı təqdirdə, ABŞ-a idxal olunan bütün Kanada məhsullarına 100 faiz gömrük rüsumu tətbiq ediləcəyini bəyan edib.
AzerVoice xəbər verir ki, Tramp Vaşinqtonun Kanadanın Çin məhsulları üçün ABŞ bazarına alternativ kanal kimi istifadə olunmasına imkan verməyəcəyini vurğulayıb. Onun sözlərinə görə, belə bir addım Amerika iqtisadi təhlükəsizliyinə ziddir və qəti qarşısı alınacaq.
Bu açıqlama Ağ Evin Kanada ilə bağlı ritorikasının sərtləşdiyi bir dövrə təsadüf edir. Son aylarda ticarət və strateji məsələlər fonunda Vaşinqton–Ottava münasibətlərində gərginliyin artdığı bildirilir.
Qərb mediasında daha əvvəl yayılan məlumatlara əsasən, Kanada federal hakimiyyəti ABŞ ilə mümkün hərbi qarşıdurma ssenarisi üzrə nəzəri plan hazırlayıb. Bildirilir ki, bu, son yüz ildən artıq dövrdə ABŞ-a qarşı mümkün konfliktin ilk rəsmi modelləşdirilməsidir.
Məlumatlarda vurğulanır ki, sözügedən plan tamamilə nəzəri xarakter daşıyır və asimmetrik şəraitdə kiçik hərbi və mülki qrupların davranışlarını nəzərdə tutur. Mənbələr Kanadanın genişmiqyaslı hərbi qarşıdurmada ABŞ-a müqavimət göstərə biləcək gücə malik olmadığını və belə ssenaridə əsas mövqeləri sürətlə itirə biləcəyini qeyd ediblər.
Eyni zamanda, ABŞ tərəfindən hərbi hücum ehtimalının son dərəcə aşağı qiymətləndirildiyi, bu cür ssenarilərin isə yalnız ən pis ehtimala hazırlıq məqsədi daşıdığı bildirilir. Kanada rəsmiləri planın detalları ilə bağlı ictimaiyyətə açıqlama verməsələr də, artan gərginlik şəraitində risklərin qiymətləndirilməsinin vacibliyini önə çəkiblər.
