BAKI,VOA

Albaniyada müxalifətin çağırışı ilə paytaxt Tiranada keçirilən kütləvi etiraz aksiyasında minlərlə insan Baş nazir Edi Ramanın rəhbərlik etdiyi hökumətin istefasını tələb edib.

VOA xəbər verir ki, etiraz aksiyası ölkənin əsas müxalifət qüvvəsi olan Demokratik Partiyanın (PD) təşəbbüsü ilə baş tutub.

Nümayişçilər hökuməti korrupsiyada ittiham edərək Baş nazirliyin binası qarşısında toplaşıb.

Aksiya zamanı bəzi etirazçılar Baş nazirlik binasına molotov kokteylləri və hava fişəngləri atıb. Etirazda çıxış edən Albaniyanın sabiq baş naziri və Demokratik Partiyanın sədri Sali Berisha nümayişlərin davam edəcəyini bildirib.

Berishanın çıxışından sonra etirazçılar parlament binasına doğru yürüş edib. Burada da oxşar insidentlər qeydə alınıb.

Polis aksiyanı dağıtmaq üçün gözyaşardıcı qaz və tazyiqli sudan istifadə edib. Yerli mənbələrin məlumatına görə, qarşıdurma zamanı bir neçə nəfər xəsarət alıb.

Etirazçılar, həmçinin korrupsiya iddiaları ilə ötən il vəzifədən uzaqlaşdırılıb daha sonra yenidən postuna qaytarılan Baş nazirin müavini və İnfrastruktur və Energetika naziri Belinda Ballukunun da istefasını tələb ediblər.

Aksiya zamanı yüzlərlə polis əməkdaşı əraziyə cəlb olunub, Tirananın bir sıra mərkəzi küçə və prospektlərində nəqliyyatın hərəkəti müvəqqəti məhdudlaşdırılıb.