BAKI, VOA, Nailə Babazadə
Polşa Baş naziri Donald Tusk ölkəsinin İranla davam edən münaqişəyə hərbi müdaxilə etməyəcəyini və bölgəyə əsgər göndərməyəcəyini açıqlayıb.
VOA xəbər verir ki, Tusk bu bəyanatla ABŞ Prezidenti Donald Trampın Hörmüz boğazının təhlükəsizliyi ilə bağlı çağırışlarından sonra nazirlər kabinetinin iclasından əvvəl çıxış edib.
Baş nazir Yaxın Şərqdəki bu münaqişənin Polşanın təhlükəsizliyinə birbaşa təsir göstərmədiyini vurğulayıb. Polşanın NATO çərçivəsində başqa öhdəliklərinin olduğunu xatırladan Tusk müttəfiqlərin bu mövqeyi anlayışla qarşıladığını bildirib. O, ölkənin quru, hava və dəniz qüvvələrinin hazırkı imkanlarının ilk növbədə Baltik dənizinin təhlükəsizliyinə xidmət etməli olduğunu qeyd edib. Donald Tusk ABŞ da daxil olmaqla bütün müttəfiqlərin Polşanın bu prioritetlərini yaxşı bildiyini və hər hansı narahatlığa əsas olmadığını əlavə edib.
Xatırladaq ki, ABŞ Prezidenti Donald Tramp verdiyi müsahibələrin birində NATO müttəfiqlərinin Hörmüz boğazının təhlükəsizliyinin təmin edilməsində iştirak etməməsinin alyansın gələcəyi üçün çox pis nəticələnə biləcəyi barədə xəbərdarlıq etmişdi.
