BAKI,VOA, Fərid Mikayılov
Moldova parlamenti Müstəqil Dövlətlər Birliyinin (MDB) yaradılması haqqında sazişin və təşkilatın nizamnaməsinin denonsasiyasını nəzərdə tutan qanunları son oxunuşda qəbul edib.
VOA xəbər verir ki, təşəbbüs ölkənin Xarici İşlər Nazirliyi tərəfindən irəli sürülüb.
Nazirlik bildirib ki, MDB-nin əsas prinsipləri və dəyərləri artıq bəzi üzv dövlətlər tərəfindən qorunmur.
Qeyd olunub ki, bu addım Moldova hökumətinin Avropa İttifaqına inteqrasiya strategiyasının tərkib hissəsidir və ölkənin Avropa standartlarına uyğunlaşmasına xidmət edir.
Parlamentin açıqlamasına görə, Moldova indiyədək MDB çərçivəsində imzalanmış 283 sazişdən 71-ni artıq ləğv edib, təxminən 60 sənəd isə hazırda baxılma mərhələsindədir. Bu proses milli qanunvericiliyin və iqtisadi sistemin Avropa İttifaqının norma və tələblərinə uyğunlaşdırılması məqsədi daşıyır.
Moldova prezidenti qanunları imzaladıqdan sonra Xarici İşlər Nazirliyi sənədləri MDB-nin İcraiyyə Komitəsinə təqdim edəcək. Vyana Konvensiyasına uyğun olaraq, təşkilatdan çıxış prosesi 12 ay ərzində tamamlanacaq.
