BAKI,VOA, Orxan Qədirzadə

Meksikada narkotik kartellərə qarşı keçirilən genişmiqyaslı əməliyyat nəticəsində axtarılan əsas fiqurlardan biri ələ keçirilib.

VOA xəbər verir ki, Meksika hakimiyyətinin keçirdiyi xüsusi əməliyyat zamanı “El Jardinero” ləqəbli narkotik qaçaqmalçısı Audias Flores Silva Nayarit ştatının El Mirador bölgəsində saxlanılıb.

Meksikanın Təhlükəsizlik və Vətəndaşların Müdafiəsi naziri Omar Qarsiya Harfuch bildirib ki, əməliyyat Hərbi Dəniz Qüvvələri tərəfindən planlaşdırılıb və xüsusi təyinatlı qüvvələrin iştirakı ilə həyata keçirilib. Onun sözlərinə görə, saxlanılan şəxs həm Meksikada, həm də ABŞ tərəfindən axtarışda olub.

Məlumata əsasən, əməliyyata təxminən 100 hərbçi, 6 helikopter və 4 təyyarə cəlb edilib. Şübhəlinin yanında 60 nəfərlik mühafizə qrupu və çoxsaylı nəqliyyat vasitələri olsa da, əməliyyat atışma olmadan başa çatdırılıb.

Rəsmi məlumatlarda qeyd olunur ki, təhlükəsizlik orqanları şübhəlinin fəaliyyətini təxminən 19 ay ərzində izləyib. ABŞ tərəfi onun yerinin müəyyənləşdirilməsi üçün 5 milyon dollara qədər mükafat elan etmişdi.

Audias Flores Silvanın “Jalisco Yeni Nəsil Karteli” (CJNG) ilə əlaqəli olduğu və kartelin əvvəlki lideri kimi tanınan El Mençonun varislərindən biri hesab edildiyi bildirilir.

Əməliyyatdan sonra bölgədə gərginlik artıb. Kartel üzvlərinin cavab reaksiyası olaraq bir sıra şəhərlərdə avtomobillərin yandırılması, yolların bağlanması və obyektlərin dağıdılması halları qeydə alınıb. Nayarit ştatının yerli hakimiyyəti əhaliyə zəruri olmadıqca evdən çıxmamaq barədə xəbərdarlıq edib.

Tecuala, Akaponeta və Ahuakatlan şəhərlərində baş verən hadisələr nəticəsində çoxsaylı nəqliyyat vasitələri və obyektlər yandırılıb.

Xatırladaq ki, bundan əvvəl Meksikada keçirilən hərbi əməliyyat zamanı kartelin lideri El Menço zərərsizləşdirilmişdi. Həmin hadisədən sonra ölkənin müxtəlif bölgələrində genişmiqyaslı zorakılıq və qarşıdurmalar baş vermiş, nəticədə onlarla insan həyatını itirmişdi.