BAKI,VOA Orxan Qədirzadə

Avropa Şurasında qəbul edilən yeni bəyannamə miqrasiya siyasəti ilə bağlı Avropada yeni hüquqi müzakirələrə səbəb olub.

VOA xəbər verir ki, Moldovanın paytaxtı Kişinyovda keçirilən Avropa Şurası Nazirlər Komitəsinin iclasında üzv dövlətlər insan hüquqları ilə bağlı bəzi müddəaların yeni şərhini dəstəkləyiblər. Qərar əsasən qeyri-qanuni miqrasiyanın idarə olunması, sərhəd təhlükəsizliyinin gücləndirilməsi və üçüncü ölkələrlə əməkdaşlığın genişləndirilməsi məqsədi daşıyır.

Qəbul olunan sənədə əsasən, İnsan Hüquqları Konvensiyasının işgəncə və qeyri-insani rəftarın qadağan olunmasını nəzərdə tutan müddəaları ilə şəxsi və ailə həyatı hüququnun tətbiqinə yeni yanaşma müəyyənləşdirilib. Sənəddə bildirilir ki, qeyri-insani rəftarın qiymətləndirilməsi konkret şəraitdən və hadisənin xüsusiyyətlərindən asılı ola bilər.

Yeni yanaşmaya əsasən, dövlətlər milli təhlükəsizlik və ictimai maraqlar kimi hüquqi əsaslarla bəzi xarici vətəndaşların ölkədən çıxarılmasını həyata keçirə biləcək. Bununla yanaşı, üçüncü ölkələrdə yaradılan geri qaytarma mərkəzləri ilə əməkdaşlıq da hüquqi baxımdan mümkün mexanizmlərdən biri kimi göstərilib.

İtaliya hökuməti qəbul edilən qərarı mühüm diplomatik uğur kimi qiymətləndirib. Baş nazir Corcia Meloni bildirib ki, əvvəllər müzakirə mövzusu olan yanaşmalar artıq Avropa səviyyəsində ümumi prinsipə çevrilməkdədir. Onun sözlərinə görə, İtaliya tərəfindən Albaniya ilə əməkdaşlıq çərçivəsində başlanmış miqrasiya modeli digər ölkələr üçün də nümunə hesab edilir.

İclas çərçivəsində digər mühüm qərarlar da qəbul olunub. Üzv dövlətlər Ukraynaya dəstəyi yenidən təsdiqləyib və Rusiyanın Ukraynaya qarşı hərbi əməliyyatları ilə bağlı məsuliyyət mexanizmlərinin yaradılması istiqamətində addımlar atıblar. Avropa İttifaqı daxil olmaqla 36 dövlət Ukraynaya qarşı təcavüz cinayəti üzrə xüsusi tribunalın yaradılması qərarını dəstəkləyib.