BAKI,VOA, Fərid Mikayılov
Politico nəşri Avropada Rusiya ilə danışıqlar üçün potensial namizədlər barədə müzakirələrin davam etdiyini bildirir.
VOA xəbər verir ki, əsas problem Avropa İttifaqı ölkələrinin vahid namizəd barədə razılığa gələ bilməməsidir.
Müzakirələrdə keçmiş Almaniya kansleri Angela Merkel, Finlandiya Prezidenti Aleksandr Stubb və keçmiş İtaliya baş naziri Mario Draghi namizəd kimi göstərilib.
Politico qeyd edir ki, Merkel Rusiya Prezidenti Vladimir Putin və Ukrayna Prezidenti Volodimir Zelenski ilə birbaşa təmas təcrübəsinə malikdir, lakin bəzi Avropa siyasətçiləri onun keçmiş vasitəçilik səylərini uğursuz hesab edir. Stubb əvvəl bu rola maraq göstərmişdi, lakin Finlandiyanın NATO üzvlüyü Moskvada onun qəbulunu çətinləşdirə bilər. Draghi isə nisbətən neytral namizəd kimi qiymətləndirilir, lakin hələlik rəsmi olaraq danışıqlarçı kimi iştirak etmək niyyətini açıqlamayıb.
Əvvəllər Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallas isə Rusiya ilə dialoqda danışıqlarçı olmaqdan imtina edib.
