BAKI,VOA,Yusif Şərifzadə
ABŞ və İran arasında davam edən diplomatik təmaslarla bağlı yeni açıqlama Vaşinqton–Tehran münasibətlərində mümkün irəliləyiş ehtimallarını yenidən gündəmə gətirib. ABŞ Prezidenti Donald Tramp tərəflər arasında danışıqların müsbət istiqamətdə inkişaf etdiyini bildirib.
VOA xəbər verir ki, Donald Tramp son açıqlamasında Vaşinqton və Tehranın mümkün razılaşmaya hər keçən gün daha da yaxınlaşdığını qeyd edib.
ABŞ prezidentinin sözlərinə görə, tərəflər arasında aparılan müzakirələrdə müəyyən irəliləyiş müşahidə olunur.
O bildirib: “Biz hər gün daha yaxşı nəticəyə doğru gedirik.”
Tramp əlavə edib ki, mümkün razılaşma İranın zənginləşdirilmiş uranı ilə bağlı məsələnin qənaətbəxş şəkildə həll edilməsini nəzərdə tuta bilər. Bununla yanaşı, o, razılaşmanın detalları barədə əlavə məlumat verməyib.
ABŞ prezidenti çıxışında həmçinin vurğulayıb: “Yalnız istədiyimiz hər şeyi əldə etdiyimiz bir sazişi imzalayaram.”
Analitiklər hesab edirlər ki, son açıqlamalar Vaşinqton və Tehran arasında diplomatik proseslərin davam etdiyini göstərsə də, yekun razılaşmanın şərtləri və məzmunu ilə bağlı qeyri-müəyyənlik hələ də qalır.
