BAKI,VOA,Yusif Şərifzadə
Omanın xarici işlər naziri Bədr bin Həməd əl-Busaidi İran və ABŞ arasında əldə olunan anlaşmanı müsbət qiymətləndirərək onun beynəlxalq ictimaiyyət tərəfindən dəstəklənməli olduğunu bildirib.
VOA xəbər verir ki, Oman rəsmisi açıqlamasında bütün dünya ictimaiyyətinin İran və ABŞ arasında əldə olunan anlaşmanı alqışlamalı olduğunu qeyd edib.
Əl-Busaidinin sözlərinə görə, bu razılaşma diplomatiyanın imkanlarını bir daha nümayiş etdirir.
O bildirib ki, əldə olunan nəticə qarşıdurma və gərginliyin deyil, dialoq və danışıqların üstünlüyünü göstərir.
Nazir vurğulayıb ki, bölgədə sabitliyin təmin olunması üçün diplomatik səylərin davam etdirilməsi vacibdir.
Onun fikrincə, razılaşma regional və beynəlxalq təhlükəsizliyə müsbət təsir göstərə bilər.
Əl-Busaidi bu nəticəni "diplomatiyanın və sağlam düşüncənin vaxtında qazanılmış qələbəsi" kimi qiymətləndirib.
Oman son illərdə İran və ABŞ arasında aparılan danışıqlarda vasitəçi rolunu oynayan əsas ölkələrdən biri kimi çıxış edib.
