BAKI,VOA Orxan Qədirzadə
Venesuelada paytaxt Karakas yaxınlığında baş verən iki güclü zəlzələnin qurbanlarının sayı artmaqda davam edir. Son rəsmi məlumata görə, təbii fəlakət nəticəsində azı 235 nəfər həyatını itirib, 4 300-dən çox insan yaralanıb. Axtarış-xilasetmə əməliyyatları isə fasiləsiz davam etdirilir.
Paytaxt Karakas və sahilyanı La Quayra şəhərində dağılan binaların dağıntıları altında qalan insanların xilas edilməsi üçün xilasedicilər zamanla yarışır. Rəsmilər bildirirlər ki, itkin düşənlərin sayının 40 mindən çox olması ölənlərin sayının yaxın saatlarda və günlərdə daha da arta biləcəyi ehtimalını gücləndirir.
ABŞ Geoloji Xidməti (USGS) açıqlayıb ki, əvvəlcə 7,2, cəmi 39 saniyə sonra isə 7,5 bal gücündə ikinci zəlzələ qeydə alınıb. Hər iki zəlzələnin ocağının yer səthinə yaxın olması dağıntıların miqyasını əhəmiyyətli dərəcədə artırıb.
USGS-in məlumatına görə, ilk zəlzələnin ocağı 21,9 kilometr, ikinci zəlzələnin ocağı isə cəmi 10 kilometr dərinlikdə yerləşib.
Bildirilib ki, zəlzələlər çərşənbə günü yerli vaxtla saat 18:04-də, ölkədə rəsmi tətil günü baş verdiyindən əhalinin böyük hissəsi həmin vaxt evlərində olub.
Yeraltı təkanlardan sonra evləri dağılan və ya təhlükəli hesab edilən minlərlə sakin gecəni açıq havada keçirməyə məcbur qalıb.
Venesuelanın müvəqqəti prezidenti Delsi Rodriqes ölkədə fövqəladə vəziyyət elan edib. Milli Assambleyanın sədri Xorxe Rodriqes isə ölənlərin sayının sürətlə artdığını bildirib.
Məlumata görə, təkcə La Quayra şəhərində 10 mərtəbəli hotel də daxil olmaqla çoxsaylı yaşayış və inzibati binalar tamamilə dağılıb və ya ciddi ziyan görüb.
Zəlzələdən paytaxt Karakasla yanaşı Truxilyo, Yarakuy, Karabobo, Araqua və Miranda ştatları da ciddi zərər çəkib.
Karakasın Çakao rayonunun meri Qustavo Duke dağılan binalardan birinin qarşısında keçirdiyi brifinqdə bildirib ki, yalnız həmin ərazidə 11 nəfər ölüb, 23 nəfər isə dağıntılar altından sağ çıxarılıb.
Paytaxt yaxınlığında yerləşən Simon Bolivar Beynəlxalq Hava Limanı terminal binasında tavanların çökməsi və infrastrukturun ciddi zədələnməsi səbəbindən bütün uçuşlar dayandırılıb.
Əsas zəlzələlərdən sonra bölgədə ən azı 30 afterşok qeydə alınıb. Elektrik və internet rabitəsində yaranan genişmiqyaslı fasilələr zərərin qiymətləndirilməsi və xilasetmə işlərini çətinləşdirir.
Fəlakətdən sonra beynəlxalq yardım kampaniyasına başlanılıb.
ABŞ axtarış-xilasetmə və humanitar əməliyyatlara dəstək məqsədilə hərbi nəqliyyat gəmiləri və təyyarələri bölgəyə göndərib, həmçinin 150 milyon ABŞ dolları məbləğində yardım ayıracağını açıqlayıb.
ABŞ Prezidenti Donald Tramp sosial şəbəkədə paylaşdığı açıqlamada federal qurumlara Venesuelaya yardımın operativ şəkildə çatdırılması üçün göstəriş verdiyini və ABŞ-ın zərərçəkənlərə dəstək verməyə hazır olduğunu bəyan edib.
ABŞ-la yanaşı Türkiyə, Meksika, Salvador, Dominikan Respublikası və Qətər də Venesuelaya axtarış-xilasetmə qrupları, tibbi heyətlər və humanitar yardım göndərilməsi üçün hazırlıqlara başlayıb.
