Tibetdə 5 bal gücündə zəlzələ baş verib

Çinin Tibet bölgəsində 5 bal gücündə zəlzələ baş verib. Yeraltı təkanların ocağının 10 kilometr dərinlikdə yerləşdiyi bildirilir. Zəlzələnin mərkəzi Nepal və Çində dağıdıcı daşqınların baş verdiyi ərazilərdən yüzlərlə kilometr şimalda qeydə alınıb. Həmin daşqınlarda yüzlərlə insanın öldüyü, mindən çox insanın isə itkin düşdüyü bildirilir. Bundan bir gün əvvəl Tibetin Naqçu bölgəsində 4,7 bal gücündə başqa bir zəlzələ qeydə alınıb. Çin hakimiyyəti Tibetdə daşqın təhlükəsi ilə əlaqədar dördüncü səviyyəli tədbirlər rejimini işə salıb. Təbii sədd nəticəsində yaranmış gölün vəziyyəti və yağıntılar nəzarətdə saxlanılır. Cironq rayonuna vəziyyəti qiymətləndirmək üçün mütəxəssislərdən ibarət heyət göndərilib.

27 Avqust 2026 21:13

BAKI,VOA,Yusif Şərifzadə

Çinin Tibet bölgəsində cümə axşamı axşam saatlarında 5 bal gücündə zəlzələ baş verib. Almaniya Geologiya Elmləri Araşdırma Mərkəzinin məlumatına görə, yeraltı təkanların ocağı 10 kilometr dərinlikdə, Tibetin şimalında yerləşib.

VOA xəbər verir ki, zəlzələnin mərkəzi bir gün əvvəl güclü qəfil daşqınların baş verdiyi Nepal və Çin ərazilərindən yüzlərlə kilometr şimalda qeydə alınıb. Daşqınlar nəticəsində yüzlərlə insanın həlak olduğu, mindən çox şəxsin isə itkin düşdüyü bildirilir.

Çinin Zəlzələ Şəbəkələri Mərkəzi çərşənbə günü Tibetin Naqçu bölgəsində 4,7 bal gücündə başqa bir zəlzələnin baş verdiyini də açıqlayıb.

Bununla yanaşı, Tibetdə daşqın təhlükəsinin davam etdiyi bildirilir. Çin bölgədə təbii sədd nəticəsində yaranmış gölün daşması və ya səddin dağılması təhlükəsi ilə əlaqədar dördüncü səviyyəli daşqına qarşı tədbirlər rejimini işə salıb.

Çinin Su Ehtiyatları Nazirliyi yerli hakimiyyət orqanlarına təbii sədd nəticəsində yaranmış göldə vəziyyəti və yağıntıların səviyyəsini diqqətlə izləmək barədə göstəriş verib.

Nazirlik vəziyyətin qiymətləndirilməsi və mümkün təhlükələrə qarşı tədbirlərin görülməsinə yardım məqsədilə Cironq rayonuna mütəxəssislərdən ibarət heyət də göndərib.