BAKI,VOA Orxan Qədirzadə
Monako hakimiyyəti üç nəfərin yaralanması ilə nəticələnən partlayışı törətməkdə şübhəli bilinən Ukrayna vətəndaşının axtarışını davam etdirir.
Məlumata görə, Interpol tərəfindən yayımlanan "Qırmızı Bülleten"də 39 yaşlı Anastasiya Berezovska qəsdən adam öldürməyə cəhd, ictimai yerdə partlayıcı qurğu yerləşdirmək və cinayət məqsədilə əlbir olmaq ittihamları ilə axtarışa verilib.
Hadisə Fransanın Nitsa şəhəri yaxınlığında yerləşən və dünyanın ən varlı şəxslərinin yaşadığı təhlükəsiz bölgələrdən biri hesab olunan Monakoda ciddi rezonans doğurub.
İstintaqın məlumatına əsasən, bazar ertəsi axşam saatlarında naməlum şəxs Fransa sərhədinə yaxın yerləşən yaşayış binasının girişində bağlama qoyub. Qısa müddət sonra bina sakini olan üç nəfər – ər-arvad və onların 13 yaşlı övladı girişə daxil olarkən partlayıcı qurğu işə düşüb.
Təhlükəsizlik kameralarının görüntülərində qara balıqçı papağı taxmış şəxs əvvəlcə kişi hesab edilsə də, sonradan şübhəlinin qadın olduğu müəyyən edilib.
Monako Prokurorluğu zərərçəkənlərin kimliyini rəsmi şəkildə açıqlamayıb. Lakin müxtəlif mənbələrin məlumatına görə, hücumun hədəfi Ukrayna əsilli, hazırda Kipr vətəndaşı olan 58 yaşlı iş adamı Vadim Yermolayev, onun həyat yoldaşı və azyaşlı oğlu olub.
Partlayış nəticəsində hər iki böyük ağır xəsarət alıb. Uşaq isə həyati təhlükəsi olmayan vəziyyətdə Nitsa şəhərində yerləşən Lenval Uşaq Xəstəxanasına yerləşdirilib. Yaralı böyüklər Nitsa Universitet Xəstəxanasına çatdırılıb. Son məlumata görə, kişinin vəziyyəti stabilləşsə də, qadının vəziyyəti ağır olaraq qalır.
Interpolun yaydığı fotolarda çiyinlərinə qədər tünd saçlı qadın əks olunub. Bildirilir ki, onun sağ qolunda ehtimal olunan ilan təsvirli döymə var və alman dilində danışa bilir.
Monako Prokurorluğu cümə axşamı axşam saatlarında hücumla bağlı şübhəli şəxsin müəyyən edildiyini təsdiqləsə də, əlavə təfərrüatlar açıqlamayıb.
Qeyd edək ki, Vadim Yermolayev ən azı 2021-ci ildən Monakoda yaşayır. O, 2023-cü ilin dekabr ayından etibarən Rusiyanın ilhaq etdiyi Krımda biznes fəaliyyəti ilə əlaqədar Ukrayna tərəfindən sanksiyalara məruz qalıb.
