BAKI,VOA,Yusif Şərifzadə
NATO Zirvə Toplantısında ABŞ Prezidenti Donald Trampın alyans üzvlərinə münasibəti və müdafiə xərcləri ilə bağlı tələbləri əsas müzakirə mövzularından biri olaraq qalır.
VOA xəbər verir ki, siyasi müşahidəçilərin fikrincə, NATO liderləri Zirvə Toplantısı öncəsi Donald Trampın alyansla bağlı gələcək siyasətini anlamağa çalışırlar. Tramp isə bildirib ki, Türkiyə Prezidenti Rəcəb Tayyib Ərdoğanla dostluq münasibətlərinə görə bu toplantıda iştirak edir. O, İranla bağlı hərbi qarşıdurma zamanı bəzi NATO ölkələrinin ABŞ-ı dəstəkləmədiyini iddia edərək onlardan narazılığını bir daha ifadə edib.
NATO-nun baş katibi Mark Rütte isə çıxışında alyans ölkələrinin müdafiə xərclərinin artırılması istiqamətində atdığı addımlara diqqət çəkib. Onun sözlərinə görə, NATO üzvləri indiyədək müdafiə sahəsinə 260 milyard ABŞ dollarından çox vəsait ayırmaq öhdəliyi götürüblər.
Ukrayna Prezidenti Volodimir Zelenski də Zirvə Toplantısında çıxış edərək ölkəsinin Rusiyaya qarşı müdafiəsini gücləndirmək üçün daha çox hərbi dəstəyə ehtiyac duyduğunu bildirib. O, xüsusilə Patriot hava hücumundan müdafiə sistemləri və digər hərbi vasitələrin Ukrayna üçün həyati əhəmiyyət daşıdığını vurğulayıb. Zelenskinin sözlərinə görə, dördüncü ilinə daxil olan müharibə fonunda əlavə dəstək həlledici rol oynaya bilər.
