BAKI,VOA,Yusif Şərifzadə
Avropa İttifaqına üzv ölkələrin xarici işlər nazirlərinin əksəriyyəti işğal olunmuş Fələstin ərazilərində yerləşən İsrail yaşayış məntəqələri ilə ticarətin qadağan edilməsini dəstəkləyib.
VOA xəbər verir ki, bunu Avropa İttifaqının xarici siyasət və təhlükəsizlik məsələləri üzrə ali nümayəndəsi Kaja Kallas Brüsseldə keçirilən xarici işlər nazirlərinin görüşündən sonra açıqlayıb.
Nazirlər görüş zamanı İsrail yaşayış məntəqələrində yaşayan şəxslərin işğal olunmuş İordan çayının qərb sahilində fələstinlilərə qarşı artan zorakılıqlarına cavab tədbirlərini müzakirə ediblər.
Kaya Kallas görüşün əvvəlində bildirib ki, İordan çayının qərb sahilindəki vəziyyət qəbuledilməz həddə çatıb.
Avropa İttifaqı uzun müddətdir Yaxın Şərq siyasəti ilə bağlı mühüm qərarların qəbulunda çətinliklərlə üzləşir. Buna əsas səbəblərdən biri 27 üzv ölkə arasında, xüsusilə İsrail-Fələstin münaqişəsi ilə bağlı mövcud fikir ayrılıqlarıdır.
Kallas Avropa Komissiyasının hüquq xidmətinin rəyinə istinad edərək bildirib ki, bəzi tədbirlərin tətbiqi üçün bütün üzv ölkələrin yekdil razılığı tələb olunmaya bilər.
Mümkün ticarət məhdudiyyətləri Avropa İttifaqının İsrail yaşayış məntəqələri ilə bağlı siyasətində mühüm dəyişiklik kimi qiymətləndirilir.
