BAKI,VOA, Fərid Mikayılov
Çin ABŞ və İranı Hörmüz boğazında kommersiya gəmilərinin təhlükəsiz və normal hərəkətinin bərpasına çağırıb.
VOA xəbər verir ki, Çin Xarici İşlər Nazirliyinin rəsmi nümayəndəsi Lin Tszyan Pekinin məsələ ilə bağlı mövqeyini açıqlayaraq, beynəlxalq ictimaiyyətin əsas gözləntisinin strateji su yolunda sabitliyin təmin edilməsi olduğunu bildirib.
“Boğazdan normal və təhlükəsiz gəmiçiliyin ən qısa zamanda bərpa edilməsi beynəlxalq ictimaiyyətin ümumi istəyidir. Pekin vəziyyətin deeskalasiyasına töhfə vermək üçün yorulmaz səylər göstərəcək”, – deyə Lin Tszyan brifinqdə qeyd edib.
Çin rəsmisinin açıqlaması ABŞ və İran arasında Hörmüz boğazı ilə bağlı artan gərginlik fonunda verilib. Dünyanın ən mühüm enerji nəqli marşrutlarından biri hesab edilən bu boğazdan hər gün böyük həcmdə neft və digər enerji resursları daşınır.
Pekin dəfələrlə bölgədə hərbi eskalasiyanın qarşısının alınmasının və beynəlxalq ticarət yollarının təhlükəsizliyinin qorunmasının vacibliyini vurğulayıb.
Hörmüz boğazında yaranan hər hansı təhlükəsizlik problemi qlobal enerji bazarlarına və beynəlxalq dəniz ticarətinə birbaşa təsir göstərə biləcək amil kimi qiymətləndirilir.
