BAKI,VOA,Yusif Şərifzadə

İsrail Ali Məhkəməsi hərbi xidmətə getməkdən imtina edən ultraortodoks yəhudi kişilərin həbsinin qarşısını almalı olan qanunun icrasını müvəqqəti dayandırıb.

VOA xəbər verir ki, mübahisələrə səbəb olan qanun hərbi xidmət yaşında olan dini təhsil müəssisələrinin tələbələrinin noyabrın 30-dək həbs edilməsini dayandırmağı nəzərdə tuturdu.

Məlumata görə, bu tarix oktyabrın 27-nə təyin edilmiş ümumi seçkilərdən sonraya təsadüf edir. Ultraortodoks siyasi partiyalarının seçkilərdə Baş nazir Benyamin Netanyahunun rəhbərlik etdiyi sağ yönümlü koalisiyanı dəstəkləyəcəyi gözlənilir.

İsrail Ali Məhkəməsi bildirib ki, qanun yalnız əhalinin müəyyən bir hissəsinə şamil olunduğu üçün onun tətbiqi müvəqqəti dayandırılıb.

Məhkəmə əlavə edib ki, qanuna qarşı təqdim olunan iddialara mümkün qədər qısa müddətdə baxılacaq.

Ultraortodoks yəhudi icmasının dini rəhbərləri uzun illərdir icma üzvlərinin hərbi xidmətə cəlb edilməsinə qarşı çıxırlar.

Onlar hesab edirlər ki, hərbi xidmət gəncləri dini təhsildən uzaqlaşdırır və icmanın ənənəvi həyat tərzinə mənfi təsir göstərir.