BAKI,VOA,Yusif Şərifzadə
ABŞ Prezidenti Donald Tramp bildirib ki, Yəməndəki husi hərəkatının regionda həyata keçirəcəyi istənilən yeni hücuma görə Vaşinqton İranı məsuliyyət daşıyan tərəf hesab edəcək.
VOA xəbər verir ki, Donald Tramp "Truth Social" sosial şəbəkəsində paylaşdığı açıqlamada husiləri İranın "vasitəçi və ya dəstək verdiyi qüvvə" kimi xarakterizə edib.
ABŞ Prezidenti qeyd edib ki, təxminən bir il əvvəl ABŞ husilərə qarşı çox güclü hərbi zərbələr endirib və bundan sonra hərəkatın müəyyən müddət ərzində daha təmkinli davrandığını iddia edib.
Lakin Trampın sözlərinə görə, husilər yenidən fəaliyyətlərini artırmağa başlayıblar və ötən gecə iki Səudiyyə Ərəbistanı gəmisinə hücum ediblər.
O bəyan edib ki, belə hücumlar təkrarlanacağı təqdirdə ABŞ İranı birbaşa məsuliyyət daşıyan tərəf hesab edəcək.
Tramp əlavə edib ki, bu halda həm İrana, həm də husi hərəkatına qarşı ciddi hərbi cəza tədbirləri görüləcək.
İran tərəfi isə ABŞ Prezidentinin bu açıqlamasına hələlik rəsmi münasibət bildirməyib.
