BAKI,VOA,Yusif Şərifzadə
ABŞ Senatı prezidentin İranla bağlı hərbi əməliyyatlar aparmaq səlahiyyətlərini məhdudlaşdırmağı nəzərdə tutan yeni qətnaməni müzakirəyə çıxarmağa hazırlaşır.
VOA xəbər verir ki, Senatın iclası saat 15:30-da Qrinviç vaxtı ilə, ABŞ-ın şərq sahili vaxtı ilə isə saat 11:30-da başlayacaq. Müzakirəyə çıxarılacaq sənəd prezidentin Konqresin rəsmi müharibə elanına dair razılığı olmadan İranla hərbi qarşıdurmanı davam etdirməsinə son qoymağı nəzərdə tutur.
Qətnamə 1973-cü ildə qəbul edilmiş Müharibə səlahiyyətləri haqqında qanunun tələblərinə əsaslanır. Həmin qanuna görə, prezident uzunmüddətli hərbi əməliyyatlar üçün Konqresin razılığını almalıdır.
Son səsvermələrdə Demokratlar prezidentin bu müharibə ilə bağlı səlahiyyətlərinin məhdudlaşdırılmasını dəstəkləyiblər. Respublikaçılar isə əsasən Ağ evin mövqeyini müdafiə etsələr də, onların arasında bir neçə senatorun demokratlarla eyni mövqedən çıxış etdiyi bildirilib.
Bununla belə, indiyədək Respublikaçılar arasında dəstək qətnamənin qəbul olunması üçün kifayət etməyib.
Müşahidəçilərin fikrincə, səsvermənin nəticəsi Respublikaçı senatorlardan neçəsinin partiya mövqeyindən fərqli qərar verməsindən asılı olacaq.
