“Abraham Linkoln” 54-cü dəniz təchizatı əməliyyatını tamamlayıb

ABŞ-nin “Abraham Linkoln” təyyarədaşıyan gəmisi Beşinci Donanmanın məsuliyyət bölgəsində 54-cü dəniz təchizatı əməliyyatını başa çatdırıb. Gəmi doqquz təchizat gəmisi ilə ümumilikdə 140 saat birgə fəaliyyət göstərib. Bu müddətdə ona 75,7 milyon litrdən çox yanacaq çatdırılıb. Bundan başqa, 10 min 261 yük altlığı həcmində ərzaq, ehtiyat hissələri və müxtəlif materiallar gəmiyə verilib. “Abraham Linkoln” təxminən doqquz aydır hərbi xidmətdədir və İrana qarşı əməliyyatlarda iştirak edib. Uzunmüddətli xidmət gəmidə təchizat və yaşayış şəraiti ilə bağlı problemlər barədə xəbərlərin yayılmasına səbəb olub. ABŞ-də bəzi qanunvericilər gəmidəki şəraitlə bağlı Hərbi Dəniz Qüvvələrindən izahat tələb ediblər. Təyyarədaşıyan gəminin yaxın zamanda ABŞ-yə qayıtması gözlənilir.

18 Avqust 2026 22:15

BAKI,VOA,Yusif Şərifzadə

ABŞ Hərbi Dəniz Qüvvələrinin “Abraham Linkoln” təyyarədaşıyan gəmisi Bəhreyndə yerləşən ABŞ Beşinci Donanmasının məsuliyyət bölgəsində 54-cü dəfə dənizdə yanacaq və təchizat qəbulunu başa çatdırıb. Gəminin rəsmi məlumatına görə, uzunmüddətli hərbi xidmət ərzində ona böyük həcmdə yanacaq, ərzaq və digər zəruri ləvazimatlar çatdırılıb.

VOA xəbər verir ki, “Abraham Linkoln” təyyarədaşıyan gəmisi təchizat əməliyyatları zamanı ABŞ Hərbi Dəniz Qüvvələrinin Dəniz Daşımaları Komandanlığına aid doqquz gəmi ilə ümumilikdə 140 saat birgə fəaliyyət göstərib. Bu müddətdə təyyarədaşıyan gəmiyə 20 milyon qallondan, yəni 75,7 milyon litrdən çox yanacaq verilib.

Bundan başqa, gəmiyə ərzaq, ehtiyat hissələri və digər materiallardan ibarət 10 min 261 yük altlığı çatdırılıb. Hərbi qulluqçular üçün nəzərdə tutulan poçt göndərişləri də dənizdə aparılan təchizat əməliyyatları vasitəsilə gəmiyə verilib.

“Abraham Linkoln” təxminən doqquz ay davam edən hərbi xidmətdən sonra ABŞ-yə qayıtmağa hazırlaşır. Gəmi 21 noyabr 2025-ci ildə San-Dieqodakı hərbi dəniz bazasından yola çıxmışdı və onun xidmət müddətinin əvvəlcə təxminən yeddi ay olması nəzərdə tutulurdu. Lakin sonradan bu müddət uzadılıb.

Təyyarədaşıyan gəmi uzunmüddətli xidmət zamanı Yaxın Şərqdə yerləşdirilib və İrana qarşı ABŞ hərbi əməliyyatlarında iştirak edib. Son məlumatlara görə, gəmi 260 gündən artıq dənizdə qalıb və onun heyəti uzun müddət limana çıxmaq imkanı əldə etməyib.

Son həftələr gəmidəki yaşayış və xidmət şəraiti ABŞ-də ciddi müzakirələrə səbəb olub. Hərbçilərin ailələrinin və bəzi dənizçilərin açıqlamalarında ərzaq və gigiyena vasitələrinin çatışmazlığı, su və kanalizasiya sistemlərində problemlər, eləcə də şəxsi heyətin mənəvi-psixoloji vəziyyəti ilə bağlı narahatlıqlar səsləndirilib. ABŞ Hərbi Dəniz Qüvvələri isə döyüş şəraitinin ənənəvi təchizat yollarını pozduğunu bildirib.

ABŞ rəhbərliyi gəminin tezliklə ölkəyə qayıdacağını açıqlayıb. “Abraham Linkoln”un bölgədəki vəzifələrinin başqa təyyarədaşıyan gəmi tərəfindən yerinə yetirilməsi nəzərdə tutulur.