BAKI, AzerVoice
ABŞ-ın tanınmış aktyoru və Hollivud əfsanəsi Robert De Niro Fransa Kann şəhərində keçirilən 77-ci Kann Film Festivalının açılış mərasimində ABŞ Prezidenti Donald Trampı sərt şəkildə tənqid edib.
AzerVoice xəbər verir ki, səhnəyə ömürlük nailiyyət mükafatı almaq üçün çıxan 81 yaşlı aktyor çıxışı zamanı Trampın sənət və yaradıcılıq sahəsinə qarşı siyasətini “mədəniyyətsizlik” adlandıraraq ictimaiyyəti etiraz etməyə çağırıb.
De Niro, uzunillik əməkdaşı Leonardo DiCaprionun təqdim etdiyi mükafatı qəbul edərkən səhnədə Halle Berry, Juliette Binoche və Quentin Tarantino kimi digər məşhur ulduzlarla birlikdə yer alıb.
“Tramp incəsənət, humanitar və təhsil sahələrinə maliyyə və dəstək kəsdi. İndi isə ABŞ xaricində istehsal olunan filmlərə 100 faiz gömrük rüsumu tətbiq edəcəyini açıqlayıb” – deyə aktyor qeyd edib.
Festival təşkilatçıları siyasi mövzulardan qaçaraq diqqəti filmlərə yönəltmək istədiklərini vurğulasalar da, Qəzza, Ukrayna və İrandan təqdim edilən filmlər, eləcə də Trampın festival ərəfəsində gömrük rüsumları ilə bağlı verdiyi qərar bu il Kannı beynəlxalq gündəmin mərkəzinə gətirib.
Bu il festivalın münsiflər heyətinə rəhbərlik edən fransız aktrisa Juliette Binoche açılış nitqində İsrailin hava hücumu nəticəsində Qəzzada həlak olan fələstinli fotojurnalist Fatma Hassonaya hörmət əlaməti olaraq onu yad edib. Fatma haqqında çəkilmiş sənədli film festivalda nümayiş olunacaq.
