BAKI, AzerVoice
Günəşdən ilin ən güclü partlayışı- X2,7 maqnitudalı Günəş parlaması radiasiya kəsintilərinə səbəb olub.
AzerVoice xəbər verir ki, 2025-ci il
mayın 14-də səhər saatlarında Günəşin şərq hissəsində X2.7 sinifli
güclü günəş parlaması qeydə alınıb.
Bu, 2025-ci ilin indiyədək müşahidə olunan ən intensiv
partlayışıdır. Partlayış nəticəsində Yer kürəsinin gündüz üzündə
qısa müddətli radio rabitə kəsintiləri müşahidə olunub.
Hadisəyə dair açıqlama verən ABŞ Milli Okean və Atmosfer İdarəsi (NOAA) bildirib ki, partlayışdan sonra Yerə əlavə təsir gözlənilmir.
Mütəxəssislər bu hadisəni Günəşin 11 illik aktivlik dövrünün ən yüksək fazasına daxil olması ilə əlaqələndirirlər. Həmin gün ərzində dörd M sinifli (orta güclü) partlayış da baş verib.
Elm adamları qeyd edirlər ki, bu cür partlayışlar Günəşdəki maqnit sahəsinin qeyri-stabilliyi — yəni maqnit xətlərinin qəfil qırılması və yenidən birləşməsi nəticəsində yaranır. Yüklü hissəciklərin Yer atmosferinə daxil olması bəzi hallarda şimal işıqları kimi optik hadisələrə səbəb ola bilər, lakin infrastruktur üçün ciddi risk adətən müşahidə olunmur.
Qeyd edək ki, alimlər hazırda Günəşdə müşahidə edilən AR 4087 adlı aktiv günəş ləkəsi bölgəsinin Yerə doğru istiqamətlənməkdə olduğunu və yaxın günlərdə yeni partlayışların da baş verə biləcəyini ehtimal edirlər.
