BAKI, AzerVoice
İsveçin məşhur avtomobil istehsalçısı Volvo Cars qlobal iqtisadi qeyri-müəyyənlik və avtomobil sektorunda artan maliyyə təzyiqləri fonunda 3 min nəfəri işdən çıxaracağını açıqlayıb.
AzerVoice xəbər verir ki, şirkətin verdiyi rəsmi məlumata görə, ixtisarların əsas hissəsi İsveçdəki ofis əsaslı və məsləhətçi mövqeləri əhatə edəcək.
Volvo Cars-ın rəhbəri və baş icraçı direktoru Hakan Samuelsson bildirib ki, bu addım asan qərar olmasa da, şirkətin uzunmüddətli dözümlülüyünü təmin etmək üçün zəruridir.
“Avtomobil sektoru çətin dövr keçirir. Bu çətinlikləri aşmaq üçün xərclərimizi struktur şəkildə azaltmalı və nağd pul axınımızı yaxşılaşdırmalıyıq”- deyə o bildirib.
İşdən çıxarılan 3 min nəfərdən təxminən 1200 nəfər İsveçdəki əməkdaşlardır. Bundan əlavə, hazırda məsləhətçilərin çalışdığı 1000 mövqe də ləğv ediləcək. Qalan ixtisarlar isə digər ölkələrdə həyata keçiriləcək.
Çinin Geely şirkətinə məxsus olan Volvo hazırda 42 600 nəfərlik qlobal heyətə malikdir. Şirkət avtomobillərini əsasən İsveçin Göteborq şəhərində, eləcə də Belçika, Cənubi Karolina (ABŞ) və Çində istehsal edir.
Volvo 2021-ci ildə 2030-cu ilə qədər bütün avtomobillərinin elektrikli olacağını bəyan etsə də, keçən il bu hədəfdən geri çəkildi. Şirkət bu qərarı çətin bazar şəraiti, Aİ və ABŞ tərəfindən tətbiq olunan yüksək gömrük tarifləri, müştəri tələbatının azalması, şarj infrastrukturu çatışmazlığı və dövlət dəstəklərinin azalması ilə əsaslandırıb.
Volvo Cars ixtisarlara gedən ən son avtomobil istehsalçısıdır. Bu ayın əvvəlində Nissan da qlobal miqyasda 11 min nəfəri işdən çıxaracağını və 7 zavodun bağlanacağını açıqlayıb. Bununla da, Nissan son bir il ərzində ümumilikdə 20 min nəfəri işdən çıxarmış oldu ki, bu da şirkətin ümumi işçi qüvvəsinin 15 faizini təşkil edir.
Digər tərəfdən, Çində elektrikli avtomobil sektoru da kəskin rəqabətlə üz-üzədir. BYD, Leapmotor və Changan kimi brendlər son aylarda qiymətlərini əhəmiyyətli dərəcədə endirib.
