BAKI,AzerVoice, Fərid Mikayılov
Şimali Koreya lideri Kim Çen In Çində keçirilən hərbi paradla ilk dəfə çox tərəfli beynəlxalq diplomatik tədbirdə iştirak edib.
AzerVoice xəbər verir ki, Kim xüsusi zirehli qatarla Pxenyandan Pekinə gələrək Tiananmen Meydanında keçirilən möhtəşəm hərbi keçid mərasiminə qatılıb.
Şimali Koreya liderinin 12 yaşında olduğu təxmin edilən qızı Kim Cu Ae də nümayəndə heyətində yer alıb. Onun dünya liderlərinin iştirak etdiyi toplantıda görünməsi beynəlxalq mediada “Kim-in varisi” kimi qiymətləndirilib. Heyətdə həmçinin Xarici işlər naziri Çoe Son-hui və digər yüksək vəzifəli şəxslər də iştirak edib.
Kim Çen In-in babası və Şimali Koreyanın qurucusu Kim İl-Sunq da 1959-cu ildə Pekində keçirilən hərbi paradda iştirak etmişdi. Bu dəfə isə Kim Çen In, tədbir çərçivəsində Çində olan Cənubi Koreya parlament sədri Vu Von-şik ilə görüşüb.
Kim Çen In 2011-ci ildə hakimiyyətə gəldikdən sonra ilk xarici səfərini 2018-ci ilin martında Çinə etmişdi. Sonrakı illərdə Çinə, Cənubi Koreyaya, Sinqapura, Rusiyaya və Vyetnama səfərlər reallaşdırıb. 2023-cü ildə isə Moskvaya və sentyabrın əvvəlində yenidən Pekinə gedib.
Çinin hərbi keçidində yeni nəsil pilotsuz uçuş aparatları, kiber və elektron müharibə vasitələri, həmçinin hipersəs silahları nümayiş etdirilib. Tədbirdə Rusiya, İran, Pakistan, Monqolustan, Belarus və digər ölkələrin liderləri ilə yanaşı, ümumilikdə 30-a yaxın dövlətin nümayəndələri iştirak edib.
Türkiyəni tədbirdə xarici işlər naziri Hakan Fidan, energetika və təbii sərvətlər naziri Alparslan Bayraktar və Pekindəki səfir Selçuk Ünal təmsil edib. Bu, Türkiyənin Çin paradına ilk dəfə nazir səviyyəsində qatılması ilə diqqət çəkib.
