BAKI, AzerVoice, Nailə Babazadə
İspanya Baş Nazir müavini və Əmək və Sosial İqtisadiyyat naziri Yolanda Diaz belə bildirib: “İspaniya səfirliyi Tel-Əvivdən çıxarılmalıdır. Fələstin bizi gözləyir.”
AzerVoice xəbər verir ki, koalisiya hökumətinin kiçik ortağı olan Sumar ittifaqından Diaz, ölkəsinin İsrailə qarşı sanksiyalar elan etməsindən sonra Bluesky sosial media platformasında mesaj yayıb. O, mesajında “İspaniya səfirliyi Tel-Əvivdən çıxarılmalıdır. Fələstin bizi gözləyir.” ifadələrindən istifadə edib.
Baş Nazir Pedro Sançesin Qəzzədəki soyqırımı səbəbindən İsrailə qarşı 9 maddəlik sanksiya qərarını açıqlamasına toxunan Diaz, “Buna görə də hökumətdəyik. Keçən həftə bunu böyük koalisiya ortağımıza (Sosialist İşçi Partiyasına) çatdırdıq. Ölkəmiz soyqırımı dayandırmaq üçün daha çox iş görməli idi.” fikrini bölüşüb.
Diaz həmçinin Fələstinə dəstəklərinə görə və İsrailə qarşı sanksiyaların tətbiqi üçün hökumətlər üzərində təzyiq göstərən vətəndaş cəmiyyəti təşkilatlarına təşəkkür edib.
Sumar ittifaqından Mədəniyyət naziri Ernest Urtasun isə İspaniya dövlət televiziyası RTVE-yə verdiyi müsahibədə hökumətin İsrailə qarşı sanksiya qərarlarını çox müsbət və güclü hesab etdiyini vurğulayıb. Urtasun, İsraillə bütün əlaqələrin kəsilməsi və İspaniyanın Tel-Əviv səfiri Ana Salomon Peresin geri çağırılmasının sanksiyalar paketinə daxil edilməsini istədiklərini, lakin hökumətin böyük ortağının buna razı olmadığını bildirib.
O, həmçinin İsrailin Eurovision mahnı müsabiqəsi kimi beynəlxalq bütün tədbirlərdən kənarlaşdırılması lazım olduğunu söyləyib.
Baş Nazir Sançes səhər verdiyi açıqlamada İsrailə silah embarqosunu qanuniləşdirən Krallıq fərmanının təsdiqlənməsi və Qəzza Zolağında soyqırım, insan haqları pozuntuları və müharibə cinayətlərinə birbaşa iştirak edən şəxslərin İspaniyaya girişinin qadağan olunması da daxil olmaqla İsrailə qarşı 9 maddəlik sanksiya qərarını elan etmişdi.
Sançesin açıqlamalarından sonra İsrail hökuməti İspaniya hökumətindən Baş Nazir müavini, Əmək və Sosial İqtisadiyyat naziri Yolanda Diaz və Gənclik və Uşaq naziri Sira Reqo (Fələstin mənşəlidir) ölkəyə girişlərinin qadağan olunduğunu açıqladı.
