BAKI, AzerVoice, Nailə Babazadə
Çoxmillətli Dəniz Qüvvələri (Combined Maritime Forces – CMF) çərşənbə axşamı bəyan edib ki, Pakistan Hərbi Dəniz Qüvvələrinə məxsus gəmi Ərəb dənizində 972 milyon dollardan çox dəyərində narkotik maddə ələ keçirib.
AzerVoice xəbər verir ki, 47 ölkədən ibarət olan bu beynəlxalq dəniz koalisiyasına Səudiyyə Ərəbistanı, ABŞ, Fransa və İspaniya da daxildir. CMF-in bəyanatında bildirilib ki, Pakistan dəniz qüvvələrinin əməkdaşları şənbə günü birinci yelkənli qayıqa çıxaraq 2 tondan çox “kristal metamfetamin” müsadirə ediblər. Əldə olunan maddənin dəyəri təxminən 822,4 milyon dollar təşkil edir.
Bəyanatda qeyd olunub ki, 48 saatdan az vaxt sonra dənizçilər ikinci yelkənli qayığı da yoxlayaraq 350 kiloqram metamfetamin (140 milyon dollar dəyərində) və 50 kiloqram kokain (10 milyon dollar dəyərində) ələ keçiriblər.
CMF-in əməliyyata rəhbərlik edən birləşmiş tapşırıq qüvvəsinin 150-ci bölüyünün komandiri komodor Fəhd əl-Cüveyd bildirib ki, bu, təşkilatın “narkotik qaçaqmalçılığına qarşı ən uğurlu əməliyyatlarından biri” olub.
Səudiyyə Ərəbistanının rəhbərlik etdiyi və qərargahı Bəhreyndə yerləşən bu tapşırıq qüvvəsinin əsas missiyası Qırmızı dəniz, Ədən körfəzi, Hind okeanı və Afrika buynuzu ətrafında qanunsuz ticarətə qarşı mübarizə aparmaqdır.
