BAKI, AzerVoice, Nailə Babazadə
Böyük Britaniya Müdafiə Nazirliyi bəyan edib ki, kiçik sayda britaniyalı hərbi planlaşdırma zabitləri Qəzzada sabitliyin təmin edilməsinə yönəlmiş səylərə dəstək məqsədilə İsrailə göndərilib. Onlar ABŞ-ın rəhbərlik etdiyi birgə əməliyyat qrupuna qoşulublar.
AzerVoice xəbər verir ki, ABŞ, Misir və Qətər bu həftə İsrail və “HƏMAS” arasında atəşkəs sazişinin ilkin mərhələlərinin möhkəmləndirilməsi və ABŞ prezidenti Donald Trampın 20 maddəlik müharibəyə son qoyma planının həyata keçirilməsi üçün intensiv vasitəçilik aparır.
Vaşinqtonun təşəbbüsü ilə yaradılan və “mülki-hərbi koordinasiya mərkəzi” kimi tanınan sabitlik qüvvəsinin əsas məqsədi Qəzzada təhlükəsizliyi təmin etməkdir. Lakin qüvvənin tərkibi, rəhbərlik strukturu və hüquqi statusu hələ tam razılaşdırılmayıb.
ABŞ bu məqsədlə 200 nəfərədək hərbçi göndərməyə razılıq verib, lakin onların Qəzzənin özündə yerləşdirilməyəcəyi bildirilir. ABŞ rəsmiləri həmçinin İndoneziya, Birləşmiş Ərəb Əmirlikləri, Misir, Qətər, Türkiyə və Azərbaycanla da bu qüvvəyə mümkün töhfələr barədə danışıqlar aparır.
Britaniya Müdafiə Nazirliyinin sözçüsü açıqlamasında bildirib ki, “azsaylı planlaşdırma zabitləri” artıq mülki-hərbi koordinasiya mərkəzinə qoşulub və onlardan biri mərkazin rəhbər müavini kimi fəaliyyət göstərəcək.
Nazirlik qeyd edib ki, bu addım ABŞ-ın rəhbərlik etdiyi Qəzza sonrası sabitlik planlaşdırmasına Britaniyanın davamlı iştirakını təmin etmək məqsədi daşıyır.
“Böyük Britaniya beynəlxalq tərəfdaşlarla birgə Qəzzada atəşkəsin qorunması və sülh prosesinə ən səmərəli şəkildə töhfə vermək istiqamətində işləməyə davam edir,” - deyə bəyanatda vurğulanıb.
Britaniya Müdafiə Naziri Con Heyli isə bildirib ki, ölkəsi xüsusi təcrübə və bacarıqlara malikdir və bu istiqamətdə ABŞ-ın müraciətinə cavab olaraq iştirak təklif edib.
“Biz bu missiyaya rəhbərlik etməyəcəyik, lakin öz rolumuzu oynayacağıq.”-deyə Con Heyli bildirib.
Heylinin sözlərinə görə, britaniyalı zabitlərin yerləşdirilməsi ABŞ-ın rəsmi müraciətinə cavab olaraq həyata keçirilib və məqsəd Qəzzada müharibədən sonrakı dövrdə beynəlxalq sabitliyin bərpasına koordinasiyalı dəstək göstərməkdir.
