BAKI, AzerVoice, Nailə Babazadə
Vatikan Dövlət Başçısı və katoliklərin ruhani lideri Papa XIV Leo, Fələstin Prezidenti Mahmud Abbas ilə Qəzzaya humanitar yardımın çatdırılması və iki dövlətli həll yolunu müzakirə edib.
AzerVoice xəbər verir ki, rəsmi səfər üçün Roma şəhərində olan Abbas səhər saatlarında Vatikanı ziyarət edib. Vatikanın açıqlamasına görə, görüş 26 iyun 2015-ci ildə Vatikanın Fələstin Dövlətini tanımasını təmin edən sazişin 10 illiyi münasibətilə keçirilib.
Açıqlamada bildirilib ki, “səmimi keçən görüşdə Qəzzadaki mülki əhaliyə təcili yardımın çatdırılmasının və iki dövlətli həll əsasında münaqişəyə son qoyulmasının vacibliyi vurğulanıb.”
Papa XIV Leo və Mahmud Abbas daha əvvəl, 21 iyulda, Qəzza və İordan çayının qərb sahilindəki vəziyyətlə bağlı telefon danışığı aparmışdılar.
Abbas səfəri çərçivəsində sabah İtaliya Prezidenti Sergio Mattarella və Baş nazir Giorgia Meloni ilə də görüşəcək. Roma şəhərində səfər səbəbindən gücləndirilmiş təhlükəsizlik tədbirləri görülüb.
Mahmud Abbas Romaya gələrkən ötən apreldə vəfat edən əvvəlki Papa Franciscusun məzarını da ziyarət edib. Abbas jurnalistlərə açıqlamasında bildirib:
“Papa Fransiskin Fələstin və fələstinlilər üçün gördüyü işləri heç vaxt unuda bilmərəm. O, Fələstini heç kimin xahişi olmadan tanıyan ilk liderlərdən biri idi.” - deyə Abbas qeyd edib.
Qeyd edək ki, Papa Fransisk 2023-cü ilin oktyabrından ölümünə qədər İsrailin Qəzzaya hücumlarını sərt tənqid etmişdi.
