BAKI, AzerVoice, Nailə Babazadə
ABŞ Prezidenti Donald Tramp, Venesuela ilə bağlı yeni açıqlamalarında Prezident Nikolas Maduro ilə müəyyən səviyyədə təmasların ola biləcəyini bildirib.
AzerVoice xəbər verir ki, Floridadakı istirahətindən Vaşinqtona dönərkən jurnalistlərin suallarını cavablandıran Tramp, “Maduro ilə bəzi görüşmələr aparır ola bilərik və bunun necə nəticələnəcəyini görəcəyik. Onlar danışmaq istəyirlər,” deyə qeyd edib.
Venesuela ilə bağlı yeni irəliləyiş olub-olmaması barədə suala isə Tramp “Xeyr, yoxdur,” cavabını verib.
Prezident, Venesuela mövzusunda Konqreslə “potensial seçimlər” barədə fikir mübadiləsi aparıb-aparmadığına dair sualı cavablandırarkən Konqresi prosesdən kənarda saxlamadıqlarını bildirib. ABŞ Dövlət Departamentinin rəhbəri Marko Rubioya Konqresi məlumatlandırmaq tapşırıldığını vurğulayan Tramp əlavə edib: “Onların təsdiqini almaq məcburiyyətində deyilik, amma məlumatlandırmaq yaxşıdır. Sadəcə istəmədiyim, əhəmiyyətli və məxfi məlumatların sızdırılmasıdır.”
Tramp, Venesuelanın “həbsxana məhbuslarının demək olar ki, hamısını” ABŞ-a göndərdiyini iddia edərək, Bayden administrasiyasını “20-25 milyon insanın ölkəyə axın etməsinə şərait yaratmaqla” günahlandırıb.
Jeffrey Epstein ilə bağlı suallara cavab verməkdən imtina edən Tramp, mövzunu gündəmə gətirən jurnalistləri tənqid edib. Prezident, “Siz bərbad bir jurnalistsiniz və belə saxta xəbərlər Tramp administrasiyasının uğurlarını kölgəyə almaq üçündür,” deyə bildirib.
Nyu-Yorkun ilk müsəlman meri seçilən Zohran Mamdani ilə bağlı sual verilməsə də, Tramp mövzuya toxunaraq Mamdaninin Vaşinqtona görüş üçün gəlmək istədiyini bildirib. “Nyu-York üçün hər şeyin qaydasında olmasını istəyirik,” deyə Tramp əlavə edib. O, daha əvvəl Mamdani mer seçilərsə şəhərə federal vəsaitlərin kəsilə biləcəyini demişdi.
