BAKI, AzerVoice, Nailə Babazadə
ABŞ Daxili Təhlükəsizlik naziri Kristi Noem, məhkəmə qərarına baxmayaraq, Venezuelalı miqrantların El Salvadora deportasiyası əmri verdiyini təsdiqləyib.
AzerVoice xəbər verir ki, NBC News-un “Meet the Press” proqramına müsahibəsində Noem bildirib ki, deportasiya uçuşlarının davam etdirilməsi qərarı onun öz səlahiyyətindədir.
“Noem bildirib ki, deportasiya qərarlarının harada və nə vaxt icra olunacağı Daxili Təhlükəsizlik Nazirliyində mənim səlahiyyətimdədir. Təhlükəli cinayətkarların ölkədən çıxarılmasını təmin etmək üçün doğru olanı etməyə davam edəcəyik”, – deyə o qeyd edib.
Məhkəmə əmrinə qarşı çıxıb-çıxmadığı soruşulduqda, Noem “Xeyr” cavabını verib və hakimlərin “aktivistlik etdiyini və radikal qərarlar verdiyini” iddia edib.
Ədliyyə Nazirliyi rəsmiləri isə bildirib ki, 26 noyabrda federal hakim tərəfindən ilin əvvəlində verilmiş, Tren de Aragua çetəsi üzvü olduğu iddia edilən Venezuelalı kişilərin El Salvadora deportasiyasını dayandırmaq əmrinə əməl etməyən şəxs Kristi Noem olub.
ABŞ-da Federal Apellyasiya Məhkəməsi sentyabr ayında Donald Tramp administrasiyasının Tren de Aragua çetəsi üzvü olmaqla ittiham etdiyi miqrantları deportasiya etmək üçün yalnız müharibə dövrlərində tətbiq olunan “Xarici Düşmənlər Qanunu”ndan istifadə edə bilməyəcəyinə qərar vermişdi.
Tramp administrasiyası, MS-13 (El Salvador köklü) və Tren de Aragua (Venezuela köklü) çetələrini “xarici terror təşkilatları” siyahısına əlavə etmişdi.
Tramp, qeyri-qanuni miqrantlarla mübarizə çərçivəsində, bu çetələrlə əlaqəli olduğu iddia edilən miqrantların deportasiyasını sürətləndirmək üçün yalnız müharibə dövrlərində istifadə olunan “Xarici Düşmənlər Qanunu”nu işə salmışdı. Tramp administrasiyası həmçinin MS-13 və Tren de Aragua üzvlərini El Salvador həbsxanalarına göndərmişdi.
İki ölkə arasında gərginlik davam edir. Tramp sosial şəbəkədə paylaşım edərək, ABŞ ordusunun donanma qüvvələrinin Venezuela açığında Tren de Aragua çetəsinə qarşı əməliyyat həyata keçirdiyini açıqlamış, Venezuela isə həmin əməliyyat videosunun “böyük ehtimalla” süni intellekt vasitəsilə hazırlandığını iddia etmişdi.
