BAKI, AzerVoice, Nailə Babazadə
Aİ Xarici İşlər və Təhlükəsizlik Siyasəti üzrə Ali Nümayəndəsi Kaja Kallas ABŞ və Ukrayna arasında aparılan sülh müzakirələrinin “çətin, amma məhsuldar” olduğunu bildirib və bu həftənin diplomatiya baxımından önəmli ola biləcəyini vurğulayıb.
AzerVoice xəbər verir ki,Aİ Müdafiə Nazirləri Toplantısı öncəsi jurnalistlərə açıqlama verən Kallas, toplantıda nazirlərlə Ukraynaya verilən dəstək və AB-nin müdafiə sahəsindəki layihələrini müzakirə edəcəyini bildirib.
Kallas Rusiyanın sülh istəmədiyini deyərək, Ukraynanın mümkün qədər gücləndirilməsinin vacib olduğunu qeyd edib. O əlavə edib ki, dünən ABŞ və Ukrayna arasında keçirilən görüşlərin nəticələrini hələ bilmirik, bugün isə Ukrayna Müdafiə Naziri Denis Şmigal və Ukrayna Xarici İşlər Naziri Andrii Sybiha nazirləri məlumatlandıracaq.
Olası sülh razılaşması çərçivəsində Ukrayna ordusunun müəyyən məhdudiyyətlərlə üzləşə biləcəyini nəzərə alaraq, Kallas bildirib ki, ordusu heç bir ölkəni işğal etməmiş Ukraynaya təzyiq ediləcəksə, Rus ordusuna da eyni təzyiq göstərilməlidir.
“Əslində, hər kəs üçün real təhlükə yaradan Rus ordusudur. Burada yalnız Avropa ölkələrindən deyil, Rusiyanın bütün qonşu ölkələrindən danışırıq,” – Kallas deyib.
ABŞ və Ukrayna heyətləri ABŞ Dövlət Katibi Marko Rubio və Ukrayna Milli Təhlükəsizlik və Müdafiə Şurası Katibi Rüstem Umerovun rəhbərliyi ilə Florida ştatında ABŞ-ın sülh planını müzakirə etmək üçün görüşüblər. Rubio və Umerov görüşün çox faydalı və məhsuldar olduğunu qeyd ediblər.
Qeyd edək ki, ABŞ və Ukrayna heyətləri bundan əvvəl 23 noyabrda İsveçrənin Cenevrə şəhərində də görüşərək ABŞ Prezidenti Donald Trump tərəfindən təqdim olunan 28 maddəli sülh planını müzakirə etmişdilər.
