BAKI, AzerVoice, Nailə Babazadə
Tayland ilə Kamboca arasında atəşkəs razılaşmasına baxmayaraq yenidən başlayan sərhəd gərginliyi silahlı toqquşmalara səbəb olub.
AzerVoice xəbər verir ki, ilkin məlumata görə, Kambocanın 4 mülki vətəndaşı həlak olub, 9 nəfər isə yaralanıb. Kamboca İnformasiya Naziri Neth Pheaktra sərhədyanı kəndlərdən on minlərlə insanın təhlükəsizlik məqsədilə köçürüldüyünü bildirib. Tayland ordusu da açıqlama yayaraq 50 mindən çox sakinin sərhəd ərazilərini tərk edərək sığınacaqlara yerləşdirildiyini bildirib.
Kamboca Baş naziri Hun Manet vəziyyətə dair açıqlamasında dövlət qurumlarını və vətəndaşları çətin dövrdə birlik nümayiş etdirməyə çağırıb. Tayland Baş naziri Anutin Charnvirakul isə ölkəsinin zorakılıq istəmədiyini, lakin suverenliyinin pozulmasına yol verməyəcəyini vurğulayıb.
Hadisələrlə bağlı hər iki ölkə bir-birini günahlandırır. Tayland Ordusunun sözçüsü Winthai Suvaree Kamboca tərəfindən Chong An Ma bölgəsində “hərbi və mülki hədəflərə” atəş açıldığını, Taylandın buna hava zərbələri ilə cavab verdiyini deyib. Kamboca Müdafiə Nazirliyi isə əksinə, Taylandın F-16 qırıcıları ilə hücuma başladığını və özlərinin cavab vermədiyini açıqlayıb.
Tayland və Kamboca arasında 817 kilometrlik sərhəd xətti boyunca uzun illərdir ərazi mübahisələri davam edir. Bu il mayın 28-də qısa müddətli toqquşma yaşanmış, iyulun 24-də isə baş verən qarşıdurmada hər iki tərəfdən toplam 32 nəfər həlak olmuşdu. Daha sonra oktyabrın 26-da Kuala Lumpurda ASEAN Zirvəsi çərçivəsində ABŞ Prezidenti Donald Trampın iştirakı ilə iki ölkə “sülh razılaşması” imzalamışdı. Razılaşmadan sonra tərəflər sərhəd bölgələrindən ağır silahların geri çəkilməsinə başlasa da, son hadisələr gərginliyin yenidən artdığını göstərir.
