BAKI,AzerVoice, Fərid Mikayılov
Qrenlandiya ilə bağlı mümkün razılaşmalar çərçivəsində Danimarka ilə ABŞ arasında aparıla biləcək danışıqlarda Kopenhagenin ən böyük üstünlüklərindən biri kimi göstərilən dərman sənayesinin real təsir gücü müzakirə mövzusuna çevrilib.
AzerVoice xəbər verir ki, Danimarkanın aparıcı ixrac sahələrindən olan kimya və dərman məhsulları 2024-cü ildə ölkənin ABŞ-a ümumi ixracının təxminən 34 faizini təşkil edib.
Danimarka Statistika İdarəsinin məlumatına görə, bu kateqoriya üzrə ixracın ümumi həcmi 21,5 milyard Danimarka kronu (təxminən 2,8 milyard avro) olub.
Bu ticarətin mərkəzində isə Ozempic və Wegovy kimi arıqlama və diabet dərmanları ilə tanınan Danimarka dərman nəhəngi Novo Nordisk dayanır. ABŞ mərkəzli Morningstar maliyyə şirkətinin qiymətləndirməsinə görə, Novo Nordisk ABŞ-da arıqlama dərmanları bazarının təxminən 43 faizinə nəzarət edir və artan rəqabətə baxmayaraq mövqeyini qoruyur.
Bununla belə, ekspertlər dərman sektorunun getdikcə daha çox geosiyasi risklərə açıq hala gəldiyini bildirirlər. Brookings İnstitutunun səhiyyə iqtisadçısı Marta Vosinska hesab edir ki, Danimarka bu üstünlükdən siyasi təzyiq aləti kimi istifadə etməyə çalışarsa, bu, əks effekt verə bilər. Onun sözlərinə görə, belə addım Kopenhagenin manevr imkanlarını daha da zəiflədə bilər.
Mütəxəssislər vurğulayırlar ki, Ozempic və Wegovy kimi preparatlar mühüm olsa da, antibiotik və ya onkoloji dərmanlar kimi “vazkeçilməz” kateqoriyaya aid deyil. Bu səbəbdən, ABŞ bazarında alternativlərin mövcudluğu Danimarkanın təzyiq imkanlarını məhdudlaşdırır. Xüsusilə Eli Lilly şirkətinin istehsal etdiyi Mounjaro dərmanının Novo Nordisk üçün ciddi rəqib olduğu qeyd olunur.
Ekspertlərin hesablamalarına görə, ABŞ bazarı Novo Nordisk-in semaqlutid əsaslı məhsullarından əldə etdiyi gəlirlərin təxminən 70 faizini formalaşdırır. Bu isə hər hansı məhdudiyyətin ilk növbədə Danimarka şirkətinin özünə ciddi maliyyə zərbəsi vura biləcəyini göstərir.
Nəticə etibarilə, analitiklər Danimarkanın dərman sektorunu Qrenlandiya ilə bağlı danışıqlarda mühüm strateji üstünlüklərindən biri kimi görməyin riskli olduğunu və bu kartın gözləniləndən daha zəif ola biləcəyini bildirirlər.
