BAKI, AzerVoice, Nailə Babazadə
UNICEF-in icraçı direktoru Ketrin Rassel dünyadakı münaqişələr, iqlim şokları, iqtisadi qeyri-sabitlik və bərabərsizliyin uşaqlar üzərində böyük təzyiq yaratdığını bildirib.
AzerVoice xəbər verir ki, o, 2026-cı ildə 130-dan çox ölkədə 200 milyondan çox uşağın humanitar yardıma ehtiyacı olacağını vurğulayıb. Rasselin sözlərinə görə, uşaqların qarşılaşdığı çətinliklər getdikcə daha mürəkkəb və qütbləşmiş xarakter alır.
İcraçı direktor son 30 ildə uşaq sağlığı sahəsində əldə edilən irəliləyişlərə baxmayaraq, 2025-ci ilin bu əsrdə uşaq ölümlərinin artdığı ilk il ola biləcəyi barədə xəbərdarlıq edib. O qeyd edib ki, bu vəziyyət nəsillər boyu davam edən tərəqqini geri döndərə bilər. Rasselin fikrincə, uşaqların üzləşdiyi indiki humanitar vəziyyət tarixin ən ağır dövrlərindən biridir.
Ötən il uşaqlara qarşı törədilən ağır hüquq pozuntularının rekord həddə çatdığını bildirən Rassel, 2025-ci ildə eyni vaxtda iki fərqli bölgədə rəsmi qıtlıq elan edilməsinin görünməmiş və narahatlıq doğuran bir hadisə olduğunu vurğulayıb. Milyonlarla uşağın qida çatışmazlığından əziyyət çəkdiyini deyən direktor, ehtiyacların artmasına rəğmən resursların azaldığını diqqətə çatdırıb. O, maliyyə kəsintilərinin humanitar missiyaların həyata keçirilməsinə ciddi maneə yaratdığını bildirərək beynəlxalq ictimaiyyəti daha fəal olmağa çağırıb.
