BAKI, VOA, Nailə Babazadə

İsveçrənin Cenevrə şəhərində Omanın vasitəçiliyi ilə İran və ABŞ nümayəndə heyətləri arasında keçirilən nüvə müzakirələrinin üçüncü raunduna qısa fasilə verilib. Tərəflər arasında mesaj mübadiləsi vasitəsilə həyata keçirilən dolayı görüşlərin növbəti mərhələsi bir neçə saatlıq fasilədən sonra yenidən davam edəcək.

VOA xəbər verir ki, ABŞ nümayəndə heyəti təxminən 3 saat davam edən müzakirələrdən sonra Oman səfirliyinin iqamətgahını açıqlama vermədən tərk edib. Görüşlərin keçirildiyi ərazidə Cenevrə polisi tərəfindən geniş təhlükəsizlik tədbirləri görülüb və bəzi küçələrdə hərəkət məhdudlaşdırılıb.

Xatırladaq ki, 2025-ci ilin iyun ayında İsrail və ABŞ-ın İrana hərbi hücumları səbəbindən kəsilən nüvə danışıqları, Türkiyə başda olmaqla region ölkələrinin təşəbbüsü ilə yenidən canlanıb. 2026-cı il fevralın 6-da Omanda, fevralın 17-də isə Cenevrədə baş tutan görüşlərdən sonra tərəflər bu gün – 26 fevral tarixində yenidən bir araya gəlmək barədə razılığa gəlmişdilər.