BAKI,VOA, Nailə Babazadə
ABŞ-ın maliyyə naziri Skott Bessent dənizdə gözləyən İran neftinin satışına imkan yaradan məhdud və qısamüddətli ümumi lisenziya yayımladıqlarını açıqlayıb.
VOA xəbər verir ki, Bessent sosial media hesabında etdiyi paylaşımda İranı qlobal terrorizmin mərkəzi adlandırıb və ABŞ Prezidenti Donald Trampın "Dastani Qəzəb Əməliyyatı" sayəsində bu mübarizəni gözləniləndən daha sürətli qazandıqlarını qeyd edib. Nazir vurğulayıb ki, Tramp administrasiyası qlobal enerji axınını maksimuma çatdırmaq və bazar sabitliyini təmin etmək üçün Amerikanın iqtisadi və hərbi gücündən istifadə etməyə davam edəcək.
Maliyyə naziri hazırda dənizdə olan İran neftinin satışına icazə verilməsi ilə təxminən 140 milyon barel neftin sürətlə qlobal bazara çıxarılacağını bildirib. O, bu addımın qiymətləri aşağı saxlamaq üçün atıldığını və İran neftinin Tehrana qarşı bir vasitə kimi istifadə edildiyini qeyd edib. Bessent bu icazənin yalnız hazırda daşınma mərhələsində olan neftə aid olduğunu, yeni alışlara və ya istehsala icazə verilmədiyini xüsusi vurğulayıb.
ABŞ Maliyyə Nazirliyinin yayımladığı sənədə əsasən, 20 mart yerli vaxtla saat 00:01-dən əvvəl gəmilərə yüklənmiş İran mənşəli xam neft və neft məhsullarının satışı, çatdırılması və ya boşaldılması ilə bağlı əməliyyatlara müvəqqəti icazə verilir. Sözügedən icazə 19 aprel yerli vaxtla saat 00:01-ə qədər qüvvədə olacaq.
